Wubědźowanja
Wubědźowanja su skutkowny instrument za to, nowych spěchowanskich partnerow, spěchowanske zakłady abo spěchowanjahódne předewzaća a talenty namakać. Zdobom pomhaja, nowe aktualne temowe wobłuki wotkrywać. Wujasnić móže so nimo toho, zo so wuběranske procesy přewjedu po objektiwnych kriterijach, kiž hodźa so přepruwować.
Wubědźowanje idejow "Rěč zwjazuje. Rěc zwězujo. Sorbisch verbindet."
W lěće 2021 je Załožba za serbski lud prěni króć wubědźowanje wupisała, zo by z mytowanjom ideje za projekty spěchowała, kotrež serbsku rěč a identitu na wosebite wašnje widźomne abo słyšomne činja. Bytostne kriterije za spožčenje mytow běchu 2021 a su to tež w aktualnym idejowym wubědźowanju 2023: inowacija, dołhodobne skutkowanje, tworjenje zhromadnosće, zhromadne dźěło z třećimi.
Wobšěrne informacije k aktualnemu wubědźowanju idejow namakaće tu.
Literarne wubědźowanje
Zhromadnje z Ludowym nakładnistwom Domowina wupisa Załožba za serbski lud kóžde druhe lěto wubědźowanje serbskeje rěče a literatury.
Na wubědźowanju, kiž ma zaměr spěchowanja literarneho dorosta, móža so zajimcy hač do staroby 35 lět wobdźělić. Jury hódnoći w kategorijach lyrika, krótkoproza a dlěša proza/dramatika.
Najlěpše twórby wozjewja so w publikacijach Ludoweho nakładnistwa Domowina, kaž na přikład w ediciskim rjedźe Paternoster.
Literarne wubědźowanje 2025
Wupisanje
Literarne wubědźowanje Ludoweho nakładnistwa Domowina a Załožby za serbski lud 2025
Namołwjamy wšitkich młodych pisacych so pjera jimać.
Pisajće wo dźensnišim času, wo zašłosći abo wo přichodźe, pisajće wo ludźoch, kiž su wam bliscy, wo swojich wobkedźbowanjach a nazhonjenjach, wo zbožownych wokomikach abo wo strachach, wo sonach a žedźbach!
Jury mytuje twórby w třoch kategorijach:
Kategorija A Kategorija B Kategorija C
basnje, lyriska proza krótka proza dlěša proza, dramatika
1. myto: 150,00 € 1. myto: 200,00 € 1. myto: 400,00 €
2. myto: 100,00 € 2. myto: 150,00 € 2. myto: 300,00 €
3. myto: 75,00 € 3. myto: 100,00 € 3. myto: 200,00 €
Dalše radźene přinoški mytuja so z dobropisom za Smolerjec kniharnju.
Wosebite myto
Najlěpši přinošk wobdźělnicy/wobdźělnika pod 16 lětami, kiž njeje mjez mytowanymi h. mj. kategorijow, mytuje so z dobropisom za Smolerjec kniharnju.
Za kategoriju C ma twórba wopřijeć znajmjeńša 10 000 znamješkow.
Wuměnjenja wobdźělenja:
- Wobdźělnica/wobdźělnik je na dnju zapodaća pod 30 lětami a nima swójske knižne wudaće (ćišćane/e-book).
- Twórba je spisana w hornjo- abo delnjoserbšćinje a njeje ani w nowinach, časopisach, knihach abo w interneće wozjewjena ani so zapodała za dotalne literarne wubědźowanja.
- Twórba je zapodata z mjenom, datumom narodźenja, adresu a e-mejlowej adresu.
Posledni dźeń zapodaća: 31. oktober 2025
Załožba za serbski lud
John Petrik
Póstowe naměsto 2
02625 Budyšin
j.petrik@zalozba.de
Jury ma prawo, myta po swojim namjeće rozdźělić. Prawniski puć je wuzamknjeny.
Najlěpše twórby wozjewja so w LitMiks abo w Rozhledźe.
Mytowanje
Mytowanje
Mytowanske zarjadowanje 25. literarneho wubědźowanja přewjedźe so pjatk, dnja 16. januara 2026 w Budyskim "Wjelbiku". Wubědźowanje, kotrež Dom za serbske ludowe wuměłstwo 1976 prěni raz přewjedźe, wuhotowaštej znowa zhromadnje Ludowe nakładnistwo Domowina a Załožba za serbski lud.
Mjez prošenymi hosćemi bě tójšto młodych pisacych, kotřiž prěni króć literarnu twórbu zapodachu, ale tež někotryžkuli, kiž so wospjet wobdźěli. Dohromady 37 přinoškow wot 19 awtorkow a awtorow měješe jury hódnoćić. W njej skutkowachu Madleńka Šołćic, rozhłosownica a awtorka z Hrubjelčic, Lubina Hajduk-Veljkovićowa, awtorka a přełožerka z Lipska, Ingrid Hustetowa, awtorka a lektorka z Choćebuza, Pětr Thiemann, lektor za rjanu literaturu w nakładnistwje a ze stron załožby John Petrik. Na posedźenju jury wobdźěli so dale Maria Clausenowa, tohorunja lektorka a nakładnistwje.
Dobyćerjo
Kategorija A (basnje, lyriska proza: 12 awtorkow a awtor, 27 přinoškow)
1. myto: so njespožči
2. myto: Franziska Kušec z Drježdźan za basnje "Jónu", "Hdźe je lubosć", "Sy ty?", Zatřěl mje!" a "Samota"
2. myto: Annamaria Zahonowa ze Serbskich Pazlic za basnje "Gaudete", "Małe - wulke zbožo", "Po dešću" a "Nalětnik"
3. myto: Hanna Neterec z Worklec za basni "Symbioza" a "tuž moja wutroba tak ćežka je"
3. myto: Zala Ošikec z Worklec za baseń "Sćin"
dobropis: Milena Berensmeierec z Pančic-Kukowa za baseń "Běchmoj nimale"
dobropis: Helena Mikławškec z Wěteńcy za baseń "Mróčel"
Kategorija B (krótka proza: 5 awtorkow a awtor, 6 přinoškow)
1. myto: Milena Šołćic z Róžanta za krótkopowědančko "Sćin w ćmě"
2. myto: so njespožči
3. myto: Aya Hrjehorjec z Worklec za krótkopowědančko"Rybarske rubježnistwo"
dobropis: Hanna Neterec z Worklec za krótkopowědančko "< 3"
dobropis: Valentina Šołćic z Budyšina za krótkopowědančko "Druha šansa"
Kategorija C (dlěša proza, dramatika: 3 awtorki a awtor, 4 přinoškow)
1. myto: so njespožči
2. myto: Annamaria Zahonowa ze Serbskich Pazlic za seriju krótkich słuchohrow "Juro a Dunja"
3. myto: Rejzka Wjeńcyna z Worklec za powědančko "Archiw dopomnjenkow"
dobropis: Jakub Barč ze Sernjan za powědančko "Wulět do zeleneho a wróćo do zašłeho"
Wosebitej myće (za najlěpši přinošk wobdźělnicy abo wobdźělnika pod 16 lětami)
wosebite myto: Helena Brězanec z Worklec za baseń “Rano do šule”
wosebite myto: Marta Wenderothec z Chrósćic za baseń “KI-stonanje”
fota:
fota: Serbske Nowiny/Bojan Benić
Literarne wubědźowanje 2023
Literarne wubědźowanje Ludoweho nakładnistwa Domowina a Załožby za serbski lud 2023
Namołwjamy wšitkich młodych pisacych so pjera jimać.
Pisajće wo dźensnišim času, wo zašłosći abo wo přichodźe; wo ludźoch, kiž su wam bliscy, wo swojich wobkedźbowanjach a nazhonjenjach, wo zbožownych wokomikach abo strachach, wo swojich sonach a swojich žedźbach!
Jury mytuje twórby w třoch kategorijach.
Kategorija A Kategorija B Kategorija C
basnje, lyriska proza krótka proza dlěša proza, dramatika
1. myto: 150,00 € 1. myto: 250,00 € 1. myto: 500,00 €
2. myto: 100,00 € 2. myto: 150,00 € 2. myto: 300,00 €
3. myto: 75,00 € 3. myto: 100,00 € 3. myto: 200,00 €
4. myto: 50,00 € 4. myto: 50,00 € 4. myto: 100,00 €
5. myto: 25,00 € 5. myto: 25,00 € 5. myto: 50,00 €
Za kategoriju C ma twórba wopřijeć znajmjeńša 10 000 znamješkow.
Wosebitej myće
Za najlěpši přinošk wobdźělnicy/wobdźělnika pod 16 lětami spožči jury wosebite myto 100 eurow, za druhi najlěpši 50 eurow, njeje-li wobdźělnica/wobdźělnik hižo mjez mytowanymi h. mj. kategorijow.
Wuměnjenja:
- Wobdźělnica/wobdźělnik njeje starša/starši hač 35 lět a nima swójsku publikaciju (knižne wudaće/e-book).
- Twórba je spisana w hornjo- abo delnjoserbšćinje a njeje ani w nowinach, časopisach, knihach abo interneće wozjewjena ani so za dotalne literarne wubědźowanja zapodała.
- Twórba je zapodata z mjenom, datumom narodźenja, adresu a e-mejlowej adresu.
Posledni termin zapodaća: 31. oktober 2023
Załožba za serbski lud
John Petrik
Póstowe naměsto 2
02625 Budyšin
j.petrick-stiftung@sorben.com
Jury ma prawo, myta po swojim namjeće rozdźělić. Prawniski puć je wuzamknjeny.
LND wozjewi najlěpše twórby w Paternostru abo w Rozhledźe.
Dobyćerjo Literarneho wubědźowanja
nowinski artikl, Serbske Nowiny vom 15.01.2024: „Přichod serbskeho pismowstwa - 24. literarne wubědźowanje LND a Załozby za serbski lud zakónčene“
fota mytowanskeje swjatočnosće
fota: Bojan Benić, Ludowe nakładnistwo Domowina
Literarne wubědźowanje 2021
Jury je myta za najlěpše přinoški postajiła. 20 awtorow a awtorkow je cyłkownje 35 přinoškow zapodało, 32 hornjoserbskich a 3 delnjoserbske. Koronapandemije dla so tónraz mytowanske zarjadowanje njepřewjedźe.
Přehlad mytowanych a krótke hódnoćenje k jednotliwym kategorijam wubědźowanja:
Kategorija A
basnje, lyriska proza: 7 awtorow a awtorkow, 18 přinoškow
Młode a młodźi basnicy wěnuja so po wobsahu a formje jara wšelako žiwjenskej woprawdźitosći: swójskim začućam kaž zjawam swojeho wobswěta. Dominuje chutne rozestajenje, je pak tež žortnych tekstow, štož swědči wo tym, zo je při wšej ćežkosći wobstejnosćow móžno a spomóžne, na swět z humorom zhladować. Z wotstawkom najlěpše basnje je zapodała Annamaria Hadankec z Berlina/Kopšina.
1. myto: Annamaria Hadankec za basnje "Powjaz", "Naši mužojo!", "Za tebje", "Pizza", "Žedźba" a "Raj"
2. myto: so njespožči
3. myto: Fabian Brycka z Njebjelčic za baseń "cyberwrótny"
4. myto: Damian Dyrlich z Noweje Wjeski za basnje "Digitalna romanca", "Sekunda stracha" a "Infekt"
5. myto: Syman Delenk z Drježdźan za baseń "wosnje" a Franciska Kušec z Chrósćic za baseń "Basnica"
Kategorija B
krótka proza: 11 awtorow a awtorkow, 11 přinoškow
Młodźi pisacy, mjez nimi bohužel jenož jedna awtorka z Delnjeje Łužicy, wěnuja so w swojich tekstach přewažnje chutnym načasnym temam kaž socialnemu připóznaću, wumjezowanju sobučłowjekow, seksuelnej namocy, stalkingej. Derje radźene pak je jenož dźěl z nich. We wšěm, po wobsahu a rěči, jury přeswědčacy tekst mjez přinoškami njeje, čehoždla je rozsudźiła prěnje myto njespožčić.
1. myto: so njespožči
2. myto: Annamaria Hadankec za powědančko "Spytowanje"
3. myto: Justyna Michniuk z Choćebuza za powědančko "Carno-běły swět" a Sara Zeller z Chrósćic za powědančko "Na dwórnišću a wšudźe druhdźe"
4. myto: so njespožči
5. myto: Sarah Hančikec z Radworja za powědančko "Błuzna"
Kategorija C
dlěša proza, dramatika: 6 awtorow a awtorkow, 6 přinoškow
Znowa su někotři młodźi pisacy dlěše teksty zapodali, štož je jara zwjeselace. Po kwaliće kaž po wobjimje wusahujetej powědančce Annamarije Hadankec. Tež jenički delnjoserbski přinošk za kategoriju C z pjera Justyny Michniuk je po wobsahu na dobrym literarnym niwowje. Připóznaće za spisanje wobšěrnišich tekstow wšak zasłuža sej wšitcy, kiž su so z tajkim na wubědźowanju wobdźělili.
1. myto: Annamaria Hadankec za powědančce "Rabies - płaćizna wědy" a "Čeji lěs?"
2. myto: so njespožči
3. myto: Justyna Michniuk za powědančko "Mójej dwě maśerce" a Milena Šołćic z Róžanta a Julius Paška z Worklec za powědančko "Wunuzowana lubosć"
4. myto: so njespožči
5. myto: Jan Bogusz z Lipska za powědančko "Z Prahi wróćo njeje tak daloko"
Wosebite myto za najlěpši přinošk wobdźělnicy/wobdźělnika pod 16 lětami
Jan Kliman z Prawoćic a Xenia Koberec ze Sernjan za krótkopowědančko "Připóznaće wažne?"
Wosebite myto za druhi najlěpši přinošk wobdźělnicy/wobdźělnika pod 16 lětami
Johanna Klimanec z Wudworja za powědančko "Pjenjezy su přičina, čehoždla eksistujemy"
Tole běše wupisanje (płaćiwe hač do oktobra 2021).
fota: Hanka Šěnec
Wupisanje wubědźowanja wo wobdźělenje
Wustajeńca wizuelneho wuměłstwa 2019/2020
PŘECHOD ÜBERGANG PREHOD 03
Wobrazy našeje krajiny. Bilder einer Landschaft. Slike različnih krajin.
Wupisanje wubědźowanja je přihot na zhromadny projekt wustajeńcy z Muzejom moderneho wuměłstwa Korutanska - MMKK w Celovecu/Klagenfurt (Rakuska) a Muzejom za moderne a načasne wuměłstwo - KGLU (Koroška galerija likovnih umetnosti) w Slovenj Gradecu (Słowjenska).
Projekt a hesło wubědźowanja "PŘECHOD" pokročujetej Dny serbskeje kultury 2014 w Celovecu/Kla-genfurt kaž tež prezentaciju wurězkow z toho w lěće 2015 w Budyšinje, Choćebuzu a Slepom. "Wobrazy našeje krajiny. Bilder einer Landschaft" je titul basniskeho cyklusa serbskeho basnika Kita Lorenca (1938-2017), kotryž bě 1967 w Ludowym nakładnistwje Domowina wušoł, kaž tež na cyklus so złožowaceho filma Konrada Herrmanna z lěta 1972.
Wosebje witane je při požadanjach wo wobdźělenje na wustajeńcy kritiske, tež interdisciplinarne rozestajenje z irewersibelnymi změnami kultury a přirody jako sćěh industrielneho wuwića, zničenja žiwjenskeho ruma, při- a wotpućowanja, ćehnjenja mjezow, wobtwarjenja, njestrukturowaneho rozšěrjowanja sydlišćow a podobnym kaž tež zaběranje z prašenjemi dołhodobneje skutkownosće kultury.
Posledni termin požadanja: 14.05.2018
Kontakt:
Anka Němcec
telefon: 03591 550319
a.niemz-stiftung@sorben.com
trěbne dokumenty:
Wupisanje wubědźowanja.pdf
Wuměnjenja wustajenja.pdf
Formular za požadanje.pdf