Spěchuje so 10-měsačny prezencny studij (wot oktobra hač do julija).
Institut za sorabistiku Lipšćanskeje uniwersity zestaji plan wučbnych zarjadowanjow, po kotrymž maja so stipendiaća/stipendiatki wobdźělić.

Stipendij płaći so 10 měsacow.
Podlěšenje runje tak kaž přetorhnjenje a pozdźiše dalewjedźenje studija njejsu při tym móžne.

Stipendij wobsahuje:

• měsačnu podpěru we wysokosći 800 EUR,
• knižny pjenjez wot 100 EUR.

Nimo toho přewozmje Załožba za serbski lud trěbne wudawki za wobdźělenje stipendiatow/stipendiatkow na tři- do štyridnjowskej kubłanskej jězbje do sydlenskeho ruma Serbow, kotraž so prawidłownje w měrcu wotměwa.
We wopodstatnjenych padach, hdyž na přikład stipendiat abo stipendiatka so njemóže na kubłanskej jězbje wobdźělić, móže Załožba za serbski lud alternatiwnje na zakładźe próstwy přiražku za indiwiduelnu jězbu do sydlenskeho ruma Serbow přizwolić. Při tym pak dyrbi jězba direktny poćah k tematice zakónčaceho dźěła měć. Próstwje dodać matej so zrozumliwe trochowanje kóštow a wobkrućenje wuwučowaceho Instituta za sorabistiku Lipsk, kotryž stipendiata/stipendiatku při spisanju dźěła poradźuje.

Stipendij njewobsahuje semesterskej přinoškaj a přinoški za chorobne, njezbožowe a rukowanske zawěsćenje.
Informacije wo aktualnych semesterskich přinoškach hlej prošu:
www.uni-leipzig.de/studium/im-studium/rueckmeldung-und-semesterbeitrag
Informacije nastupajo trěbne zawěsćenja, wysokosć kóštow za bydlenje w Lipsku a dalše wuměnjenja za studij w Lipsku namakaće we wotrězku „Pokiwy nastupajo studijnu dowolnosć za Lipšćansku uniwersitu a druhe wuměnjenja“.

Stipendij płaći so njewotwisnje wot płaćenjow třećich, na př. dalšich stipendijow abo dźěłowych mzdow. Wukonjenje pódlanskeho dźěła za čas stipendija je pak jenož z dopokazujomnym přihłosowanjom Załožby za serbski lud dowolene. Hłowny kriterij za přihłosowanje je, zo pódlanske dźěło zaměr stipendija njewohrožuje abo so jemu njespřećiwja.

Požadanja wo stipendij móža so kóžde lěto hač do 01.03. zapodać.
Próstwy płaća za spočatk studija w zymskim semestrje wot oktobra běžneho lěta.
Stipendij, kotryž je so za wěsty studijny započatk přizwolił, njemóže so zasadnje na pozdźiši studijny započatk přenjesć.

Zajimcy dyrbja dopokazać resp. wobkrućić, zo:

• absolwuja na připóznatej wysokej šuli dale wjeducy studij (bachelor, master, statny eksamen/statne pruwowanje abo přirunujomne wotzamknjenje) w předmjeće slawistika abo podobnym směrje abo su studij zakónčili - wotzamknjenja njesmědźa starše hač 2 lěće być -; leža wotzamknjenja dale wróćo, smědźa so požadanja jenož we wopodstatnjenych padach zapodać, na př. při samodruhosći, porodźe a hladanju dźěći hač do maksimalnje 3 lěta dołho kaž tež w přirunujomnych padach (požadanju maja so dopokazy přidać),
• su znajmjeńša 2. studijne lěto dale wjeduceho studija wuspěšnje zakónčili,
• njejsu starši hač 32 lět,
• maja dosahowace rěčne znajomosće, zo njebychu wot započatka sem ćeže měli, serbskim wučbnym zarjadowanjam slědować,
  
  Jako dosahace připóznawaja so rěčne znajomosće serbšćiny znajmjeńša niwowoweho schodźenka B1 po Zhromadnym europskim referencnym ramiku (GER) resp. rěčne znajomosće druheje słowjanskeje rěče niwowoweho schodźenka C2.
  
  • Požadarjo/Požadarki, kiž pochadźeja ze słowjanskich statow resp. regionow a předpołoža wotpowědne maćernorěčne šulske resp. studijne zakónčenja, njetrjebaja swoje słowjanske rěčne znajomosće přidatnje z certifikatom dopokazać.
  • Požadarjo/Požadarki, kiž njepochadźeja ze słowjanskich statow resp. regionow, dyrbja swoje słowjanske rěčne znajomosće dopokazać - dopokaz z rěčnym wuswědčenjom abo rěčnym certifikatom.
  • Požadarjo/Požadarki, kiž maja słowjanske rěčne znajomosće niže niwowoweho schodźenka C2 po Zhromadnym europskim referencnym ramiku, dyrbja tute a přidatnje tež rěčne znajomosće serbšćiny niwowoweho schodźenka B1 dopokazać - dopokaz z rěčnym wuswědčenjom abo rěčnym certifikatom, dopokaz znajomosćow serbšćiny alternatiwnje tež z posudźowanjom připóznatych wučerjow rěče.
    
    Pokiwy:

     

    Požadarjow/požadarki, kiž so za hornjoserbšćinu zajimuja, skedźbnjamy na mjezynarodny lěćny kurs serbskeje rěče a kultury Serbskeho instituta, kotryž wotměwa so kóžde druhe lěto. Dokładniše informacije hlej prošu:
    www.serbski-institut.de/os/serbski-institut/poskitki/letni-kurs
    

    Požadarjo/Požadarki, kiž so za delnjoserbšćinu zajimuja, móža so nastupajo rěčny kursy pola Šule za dolnoserbsku rěc a kulturu informować:
    www.sorbische-wendische-sprachschule.de
    

    Nimo toho steja rěčne kursy online k dispoziciji:
    sprachkurs.sorbischlernen.de
    sorbischlernen.de
    

    Wo móžnosćach, rěčny certifikat za serbšćinu zdobyć, móža so zajimcy pola Rěčneho centruma WITAJ informować:
    www.sprachzertifikat-sorbisch.de
  
  
• su přezjedni, zo Załožba za serbski lud we wobłuku swojeje kompetency na wosobu so poćahowace daty a zakónčace dźěła, kotrež su w konteksće stipendija nastali, składuje a předźěłuje, a to nic jenož za aktualny stipendij a z tym zwisowace zarjadowanja, ale tež za dalše zarjadowanja a aktiwity, kotrež na stipendij nawjazuja.

Zajimcy za stipendij dyrbja na kóždy pad tež wuměnjenja za studij na Lipšćanskej uniwersiće spjelnić.

Prošu informujće so do zapodaća požadanja wo stipendij wo wuměnjenjach za studijnu dowolnosć direktnje na webstronje uniwersity.

Za studijnu dowolnosć so sćěhowace dokumenty žadaja:

• wuswědčenje powšitkowneje abo na fach wjazaneje wysokošulskeje zrałosće, inkl. přehlada předmjetow a znamkow - w originalnej rěči a jako hamtsce wobkrućeny němski abo jendźelski přełožk
• sće-li hižo studował/-a: dopokaz wšěch hižo docpětych studijnych wukonow a studijnych wotzamknjenjow, inkl. transcript of records - w originalnej rěči a jako hamtsce wobkrućeny němski abo jendźelski přełožk
• jeli přitrjechi: přijimanske pruwowanje wysokeje šule - w originalnej rěči a jako hamtsce wobkrućeny němski abo jendźelski přełožk.

Pokiwy nastupajo chorobne, njezbožowe a rukowanske zawěsćenje

• chorobne zawěsćenje za Němsku
  Studowacy su zakonsce winowaći, dosahace chorobne zawěsćenje dopokazać, kotrež płaći za wšón čas studijneho přebywanja w Němskej.
  Bjez tajkeho chorobneho zawěsćenja njemóže so studowacy imatrikulować.
  Zakonske chorobne zawěsćernje dyrbja studowacych přiwzać, hdyž su młódše hač 30 lět. Su-li starši hač 30 lět, dyrbja priwatne chorobne zawěsćenje wotzamknyć.
  Prošu informujće so w přiručce "Ratgeber Krankenversicherung" Lipšćanskeje uniwersity:
  www.uni-leipzig.de ... Ratgeber_Krankenversicherung_de.pdf
• njezbožowe zawěsćenje je na uniwersiće zaručene
  Studowacy su za čas wu- a dalekubłanja přez zakonske njezbožowe zawěsćenje škitani. Njezbožowe zawěsćenje na Lipšćanskej uniwersiće je přez Saksku njezbožowu kasu zaručene. Zawěsćene su činitosće wšěch wobłukow, kotrež uniwersita po wobsahu a organizatorisce zamołwja.

• rukowanske zawěsćenje so doporuči
  Wotzamknjenje rukowanskeho zawěsćenja njeje předpisane. Doporuči so pak pruwować, hač zawěsćenje w domjacym kraju tež za Němsku płaći.

Pokiwy nastupajo dowolnosć za přebywanje a wizum

• Staćenjo/Staćanki EU njetrjebaja za studijne přebywanje w Lipsku ani dowolnosć za přebywanje ani wizum. Prawnisce runostajeni su staćenjo/staćanki EWR-statow Islandska, Liechtenstein a Norwegska.
• Wšitcy, kotřiž njejsu staćenjo/staćanki EU/EWR a dlěje hač 90 dnjow w Němskej studować a bydlić chcedźa, dyrbja na zarjad za wukrajnikow próstwu wo dowolnosć za přebywanje ze zaměrom studowanja zapodać.
• Staćenjo/Staćanki statow, kiž njepřisłušeja EU/EWR, móža so na Wonkownym zarjedźe informować, hač słušeja k tym staćanam/staćankam, kotřiž smědźa bjez wizuma do Němskeje zapućować a móža próstwu wo dowolnosć za přebywanje direktnje zapodać, potajkim bjez toho, zo su do toho próstwu wo studentski wizum na Němske wulkopósłanstwo zapodali.
• Wšě staćenjo/staćanki, kotřiž njeliča k tym, kiž smědźa bjez wizuma do Němskeje zapućować, trjebaja za studijne přebywanje němski studentski wizum a dowolnosć za přebywanje. Próstwa wo studentski wizum ma so před zapućowanjom do Němskeje we wotpowědnym domjacym kraju na Němske wulkopósłanstwo zapodać a wizum dyrbi so wottam wustajeć. Próstwa wo dowolnosć za přebywanje ma so po přichadźe w Němskej zapodać.

Prošu informujće so wo tym z pomocu infołopjena Lipšćanskeje uniwersity:
www.uni-leipzig.de ... Aufenthaltserlaubnis_Studierende.pdf
Přehlad wo tym, štó trjeba za zapućowanje do Němskeje wizum a štó nic, namakaće pod:
www.auswaertiges-amt.de/de/service/visa-und-aufenthalt/staatenliste-zur-visumpflicht

Pokiw nastupajo winowatosć, so na přizjewjerni wobydlerjow registrować dać
Dokelž płaći w Němskej winowatosć, so na přizjewjerni wobydlerjow registrować dać, a dokelž wostanjeće jako stipendiat/stipendiatka dlěje hač 90 dnjow w Němskej, maće so po zapućowanju do Němskeje na přizjewjerni wobydlerjow města w Lipsku registrować dać. Za to dyrbiće:

• potwjerdźić, zo móžeće swój studij sam/-a financować,
• dopokazać, zo sće chorobnje zawěsćeny/zawěsćena,
• wobkrućenje přenajerja Wašeho studentskeho bydlenja předpołožić.

Pokiw nastupajo bydlenje w Lipsku
Měsačny podružny pjenjez za studentske bydlenje abo stwu w Lipsku wučinja po informaciji Lipšćanskeje uniwersity aktualnje něhdźe 250 do 425 EUR.
Chceće-li w internaće Studentskeho skutka Lipsk bydlić, móžeće so tam wo městno požadać.
Chceće-li zhromadnje ze serbskimi studowacymi bydlić, byšće so wo městno w internaće na Arna Nitzschowej dróze požadać dyrbjał/-a. Tam bydli wjele serbskich studowacych.
Za městno w internaće móžeće so pak hakle potom požadać, hdyž sće wot Lipšćanskeje uniwersity studijnu dowolnosć dóstał/-a.
Sposrědkujemy tu link za požadanje wo městno w internaće studentskeho skutka:
www.studentenwerk-leipzig.de/wohnen/wohnheim-bewerbung.

Požadanja maja so w postajenym času zapodać. Wužiwać smě so jenož online-formular Załožby za serbski lud.
Z e-mejlku abo póštu připósłane požadanja kaž tež požadanja, kotrež njejsu dospołne, so njewobkedźbuja.
Jako sčasom zapodate płaća požadanja, hdyž předleža hač do 24 hodź. (MEZ resp. MESZ) poslednjeho za zapodaće požadanjow dowoleneho dnja.
Njepósćelće swoje požadanje po móžnosći hakle na poslednim dowolenym dnju, zo byšće falowace podłožki hišće sčasom dodać móhł/-a a zo by so dochad zawěsćił najebać ewentualnych techniskich problemow.

Slědowace podłožki maja so zapodać:

• wupjelnjeny formular online-požadanja - prošu po móžnosći hornjoserbsce, delnjoserbsce abo němsce wupjelnić

W formularje online-požadanja maja so jako pdf-dokumenty uploadować:

• tabelariski žiwjenjoběh z fotom - prošu po móžnosći w hornjoserbšćinje, delnjoserbšćinje abo němčinje (foto móže so tež jako separatna fotowa dataja uploadować)

• wuswědčenje powšitkowneje abo na fach wjazaneje wysokošulskeje zrałosće, inkl. přehlada předmjetow a znamkow - w originalnej rěči a jako hamtsce wobkrućeny němski abo jendźelski přełožk

• dopokaz wo studiju w předmjeće slawistika abo podobnym směrje, k čemuž słušeja:

   

  • wobkrućenje studijneho wotběha domjaceje uniwersity - prošu w jendźelskej rěči
  • oficialna lisćina wšěch hižo docpětych studijnych wukonow a studijnych wotzamknjenjow, inkl. docpětych credit points (CP) a přerěznych znamkow (transcript of records) - prošu w jendźelšćinje abo w originalnej rěči a jako hamtsce wobkrućeny němski přełožk
  • hdyž přitrjechi: přijimanske pruwowanje wysokeje šule - w originalnej rěči a jako hamtsce wobkrućeny němski abo jendźelski přełožk
  sće-li studij zakónčił/-a, nimo toho:

   

  • wopismo akademiskeho titula a diploma supplement - prošu w němčinje

   

• dopokaz rěčnych znajomosćow
  Dopokazać maja so rěčne znajomosće serbšćiny znajmjeńša niwowoweho schodźenka B1 po Zhromadnym europskim referencnym ramiku (GER) resp. rěčne znajomosće druheje słowjanskeje rěče niwowoweho schodźenka C2.
  

   

  • Požadarjo/Požadarki, kiž pochadźeja ze słowjanskich statow resp. regionow a předpołoža wotpowědne maćernorěčne šulske resp. studijne zakónčenja, njetrjebaja swoje słowjanske rěčne znajomosće přidatnje z certifikatom dopokazać.
  • Požadarjo/Požadarki, kiž njepochadźeja ze słowjanskich statow resp. regionow, dyrbja swoje słowjanske rěčne znajomosće dopokazać - dopokaz z rěčnym wuswědčenjom abo rěčnym certifikatom.
  • Požadarjo/Požadarki, kiž maja słowjanske rěčne znajomosće niže niwowoweho schodźenka C2 po Zhromadnym Europskim referencnym ramiku, dyrbja tute a přidatnje tež rěčne znajomosće serbšćiny niwowoweho schodźenka B1 dopokazać - dopokaz z rěčnym wuswědčenjom abo rěčnym certifikatom, dopokaz znajomosćow serbšćiny alternatiwnje tež z posudźowanjom připóznatych wučerjow rěče.

   

• pismo nastupajo motiwaciju (pisane z computerom), kotrež krótko a pregnantnje na maks. štyrjoch stronach A4 přičiny požadanja rysuje a rozłožuje, čehodla kandidat/-ka wuměnjenja za požadanje spjelni, za kotre temy so wosebje zajimuje, hač a w kotrej měrje je dźělny studij wažny abo pomhać móže, swójske akademiske, powołanske a wosobinske zaměry docpěć - prošu po móžnosći w hornjoserbšćinje, delnjoserbšćinje abo němčinje

• znajmjeńša jedne doporučenske pismo wuwučowaceho domjaceje uniwersity studijneho předmjeta slawistika abo podobneho směra - prošu po móžnosći w hornjoserbšćinje, delnjoserbšćinje, němčinje abo jendźelšćinje.
  Doporučenja maja so paralelnje k online-sposrědkowanju w originalu z póštu pósłać na slědowacu adresu (póštowy kołk z dnja 01.03. so akceptuje jako zapodaće w postajenym času):
  
  Załožba za serbski lud / Stiftung für das sorbische Volk
  - Požadanje wo stipendij -
  Postplatz 2 / Póstowe naměsto 2
  02625 Bautzen/Budyšin
  GERMANY

Załožba za serbski lud pruwuje zapodate podłožki na prawosć a dospołnosć.
Posudźowanje požadanjow a rozsud wo spožčenju stipendijow přewozmje wot Załožby za serbski lud zwołana a po fachowych aspektach zestajena komisija. W komisiji skutkuja wuwučowacy Instituta za sorabistiku Lipsk, zwonka uniwersity skutkowacy/skutkowace wědomostnicy kaž tež zastupjerjo/zastupjerki Załožby za serbski lud. Po potrjebje wobstaraja so přidatne hódnoćenja a posudki. Ewentualnje so tež něhdyši/něhdyše stipendiaća/stipendiatki wobdźěla.
Wuzwolenske kriterije:

• spjelnjenje wuměnjenjow za stipendij
• motiwacija, wuwiwanski potencial
• dotalne studijne wukony
• doporučenske pisma
• zwonkafachowe znajomosće, zajimy a priwatny angažement, kotrež zaměr stipendija podpěraja.

Přizwolenje stipendija je wuzamknjene, hdyž je požadar/-ka stipendij Załožby za serbski lud hižo raz dóstał/-a.

Požadarjo/Požadarki so informuja, hač so jim stipendij spožči abo nic.

Prošu nawjazajće hnydom po tym, zo sće připrajenje stipendija dóstał/-a, zwisk z Institutom za sorabistiku Lipsk.
Waš tamniši narěčenski partner je Matthias Schlegel/Mato Šlegel (matthias.schlegel@uni-leipzig.de, tel. +49 341 937650, faks +49 341 97 37659). Wón podpěruje Was při přihotach na dźělny studij a za čas studija.

Jako prěnje dyrbiće próstwu wo studijnu dowolnosć na Lipšćansku uniwersitu zapodać. Hlej k tomu prošu wotrězk "Pokiwy nastupajo studijnu dowolnosć za Lipšćansku uniwersitu a druhe wuměnjenja".
Dźěl za to trěbnych dokumentow sće w kopiji (jako scan) hižo za požadanje wo stipendij trjebał/-a. Nimo toho maće na kóždy pad za Němsku płaćiwe chorobne zawěsćenje zawěsćenjea (hdyž přitrjechi) wizum a/abo wobkrućenje dowolnosće za přebywanje w Němskej předpołožić.

Po tym zo sće studijnu dowolnosć dóstał/-a, dyrbiće so na Lipšćanskej uniwersiće zapisać, so byšće tež studować móhł/-a (zapisanje mjenuje so tež imatrikulacija). Zapisać maće so hač k terminej, kiž je w zdźělence wo studijnej dowolnosći podaty.

Zdźělenka wo studijnej dowolnosći je tež z wuměnjenjom za požadanje wo městno w internaće.
Za zymski semester započina so rozdźělenje městnow w internatach zwjetša w awgusće. Zapodajće Waše požadanje (dyrbiće so prošu zasadnje sam/-a požadać) prošu na kóždy pad hač do spočatka julija. Nastupajo požadanje wo městno w internaće hlej prošu wotrězk "Pokiw nastupajo bydlenje w Lipsku".

Prošu wobkrućće Załožbje za serbski lud sčasom do nastupa studija (najpozdźišo hač do 15.09.) přiwzaće stipendija a dopokazajće w tutym zwisku imatrikulaciju na Lipšćanskej uniwersiće a Wašu adresu za studijne přebywanje kaž tež Wašeho přenajerja.
Z přiwzaćom stipendija zawjazaće so, ze stipendijom zwjazane wuměnjenja spjelnić. Jenož na tutym zakładźe wotzamknje Załožba za serbski lud z Wami stipendijowe dojednanje (priwatnoprawniske zrěčenje). Dojednanje podpisa so w zwisku z nastupom studija w Lipsku.

Někak w samsnym času dyrbiće so na přizjewjerni wobydlerjow w Lipsku registrować dać a girokonto w Němskej wotewrić, na kotryž so stipendij płaći. Wotpowědnu IBAN zdźělće prošu Załožbje za serbski lud.

Pokiw:
Mysliće prošu na to, so do wróćojězby do domizny na přizjewjerni wobydlerjow w Lipsku wotzjewić.

Stipendij a knižny pjenjez přepokaza so jenož na girokonto w Němskej.
Přepokazanja do wukraja njejsu móžne.
Płaćenja su na sćěhowace wašnje předwidźane:

• při nastupje studija w oktobrje 1.000 EUR w hotowych pjenjezach,
• wot nowembra 8 x měsačnje přeco k 5. měsaca 800 EUR z přepokazanjom,
• w juliju k 5. měsaca 600 EUR z přepokazanjom.

Knižny pjenjez přizwoli so zasadnje jenož za sorabistisku fachowu literaturu w serbskej rěči, kotruž dóstanjeće předewšěm w Smolerjec kniharni Ludoweho nakładnistwa Domowina w Budyšinje, a rozumi so jako přiražka. Knižny pjenjez wupłaći so na zakładźe předležacych zličbowankow z konkretnym pomjenowanjom kupjenych knihow, inkl. dopokaza płaćenja.

Požadanske podłožki wostanu pola Załožby za serbski lud a přeńdu do jeje swójstwa.
Na wosobu so poćahowace daty požadarjow/požadarkow składuje a předźěłuje Załožba za serbski lud we wobłuku swojeje kompetency wotpowědujo zakonjej Zwjazka wo datowym škiće a zakładnemu postajenju EU za datowy škit. Załožba za serbski lud njewužiwa daty jenož za aktualny stipendij a z tym zwisowace zarjadowanja, ale tež za dalše zarjadowanja a aktiwity, kotrež na stipendij nawjazuja.

Dalše informacije nastupajo datowy škit hlej prošu:
stiftung.sorben.com/deutsch/datenschutz.