Zjawny list nastupajo studij sorabistiki na Lipšćanskej uniwersiće
Öffentlicher Brief das Studium der Sorabistik an der Universität Leipzig betreffend

wujimk

Česćeny statny ministro Gemkow /
Sehr geehrter Staatsminister Gemkow,

zachowanje a spěchowanje serbšćiny a serbskeje kultury trjeba načasny serbskorěčny studij, kotryž so ze wšitkimi wobłukami sorabistiki zaběra. K tomu słušeja nimo rěčespyta tež stawizny, literaturowěda, ludowěda a dalše wobłuki kulturnych wědomosćow. Tole je ćim wažnišo, dokelž wukubłuje so jeničce na Lipšćanskej uniwersiće wučerski dorost za serbšćinu wšitkich šulskich družinow, kotryž we Łužicy nuznje trjebamy. To płaći tež za přichodny personal serbskich institucijow.

Dokelž stej serbšćinje słowjanskej rěči a stawizny Serbow su wusko ze słowjanskim swětom splećene, zrozumi so sorabistika jako dźěl slawistiki a ma so w tutym zmysle dale profilować. Přirunowanje z druhimi mjeńšinowymi rěčemi móže być při tym wunošne, njesteji pak w fokusu sorabistiskeho slědźenja a wuwučowanja.

Domowina, serbske institucije a nadregionalne towarstwa wočakuja, zo so kwalita studija sorabistiki na Instituće za sorabistiku zwyši, z kmanym serbskorěčnym personalom wuhotuje a z wotpowědnymi dźěłowymi městnami podkładźe. Tuchwilu studij sorabistiki serbskim potrjebam njewotpowěduje.

Slědowace konkretne naprawy su z našeho wida trěbne:

1. Docenća a sobudźěłaćerjo Instituta za sorabistiku měli serbšćinu na wysokim niwowje wobknježić. Swoje rěčne kmanosće dopokazaja woni z wotpowědnym certifikatom na niwowje C1 a perspektiwisce tež C2.
2. Institut za sorabistiku měł prawidłownje rěčnu wučbu za wšelake niwowy studentow sorabistiki poskićić. Tutón poskitk ma so tež studentam druhich fachowych směrow wotewrić.
3. Po přikładźe druhich rěčnych předmjetow měła so didaktika za bilingualnu wučbu kaž tež za serbšćinu jako druhu rěč wutwarić. Při tym měło so tohorunja na studentow druhich fachowych směrow dźiwać.
4. Nimo filologiskeho wukubłanja měło so šěroko zrozumjene sorabistiske kubłanje zaručić, kotrež dźiwa zdobom na kulturnowědomostne, literarnowědomostne, stawizniske a dalše poskitki.
5. Styki k slawistiskim institutam w tu- a wukraju měli so skrućić. Tole nastupa wosebje kooperacije na polu wuwučowanja, ale tež aktiwnu studentsku wuměnu.
6. Po Serbskim zakonju zaručitej Swobodny stat Sakska a Lipšćanska uniwersita wysokošulske wukubłanje na polu sorabistiki. K podpěrje měł Institut za sorabistiku w Lipsku kooperacije z druhimi institucijemi natwarić, kiž so ze sorabistiku zaběraja, wosebje ze Serbskim institutom w Budyšinje a Choćebuzu kaž tež z Institutom za slawistiku na Drježdźanskej TU. Měło so pruwować, hač móhli so wědomostnicy Serbskeho instituta sobu do wuwučowanja na Instituće za sorabistiku zapřijeć a je podpěrać.

Z přećelnym postrowom / Mit freundlichen Grüßen

Dawid Statnik
předsyda / Vorsitzender

list podpěruja / Unterstützer:

Judit Šołćina, hłowna jednaćelka Domowiny / Hauptgeschäftsführerin, Domowina
dr. Beata Brězanowa, nawodnica Rěčneho centruma WITAJ / Leiterin, WITAJ-Sprachzentrum
Jan Budar, direktor Załožby za serbski lud / Direktor, Stiftung für das Sorbische Volk
prof.dr. Hauke Bartels, direktor Serbskeho instituta / Direktor, Sorbisches Institut
Syman Pětr Cyž, jednaćel Ludoweho nakładnistwa Domowiny / Geschäftsführer, Domowina-Verlag
Diana Wagnerec, jednaćelka Serbskeho ludoweho ansambla / Geschäftsführerin, Sorbisches National-Ensemble
Tomas Kreibich-Nawka, intendant Serbskeho ludoweho ansambla / Intendant, Sorbisches National-Ensemble
Christina Boguszowa, direktorka Serbskeho muzeja Budyšin / Direktorin, Sorbisches Museum Bautzen
Anja Jahnojc, wjeźeca kuratorka w Serbskem muzeju Chóśebuz / leitende Kuratorin Sorbisches Museum Cottbus
Ute Henšelowa, wjednica Šule za dolnoserbsku rěc a kulturu / Leiterin, Schule für Niedersorbische Sprache und Kultur
René Wjacławk, šulski nawoda Serbskeho gymnazija Budyšin / Schulleiter, Sorbisches Gymnasium Bautzen
dr. Matthias Guttke, komisariski šulski wjednik Dolnoserbskego gymnazija Chóśebuz / kommissarischer Schulleiter, Niedersorbisches Gymnasium Cottbus
dr. Anja Pohončowa, předsydka Maćicy Serbskeje / Vorsitzende, Maćica Serbska
dr. Pětš Šurman, pśedsedaŕ Maśicy Serbskeje / Vorsitzender, Maśica Serbska
Katharina Jurkowa, předsydka Serbskeho šulskeho towarstwa / Vorsitzende, Sorbischer Schulverein