Financna situacija Załožby za serbski lud a z tym financowanje serbskich institucijow a projektow je lěto a bóle napjata. Hižo 2024 dyrbješe zarjad załožby derje ličić a z pjenjezydawarjemi jednać, zo bychu so nowo wutworjene dźěłowe městna hač do kónca tutoho lěta móhli dale wjesć. Přičiny za to su stopnjowanja mzdow přistajenych zjawneje słužby. Dokelž njeje tež lětsa přiražka za załožbu wyša hač dotal, móže so hospodarski plan 2025 jenož wurunać, hdyž so wšitke rezerwy přetrjebaja. Rezerwow dla je pak tež zaručene, zo móže załožba hižo připrajene projekty njedźiwajcy nachwilneho hospodarjenja, přizwolić. Jan Budar, direktor załožby praji: „Situacija nachwilneho hospodarjenja je powšitkownje wužadanje, spytamy pak puće namakać, zo njejsu wažne projekty a dźěławosć institucijow wohrožene.“

Nimo napjateje financneje situacije zhladuje pak załožba tež na wuspěšne lěto 2024 wróćo. Tójšto rjanych projektow je so přizwoliło a zwoprawdźiło. A woswjećichmy tež dwaj jubilejej zeńdźenjow něhdyšich a tuchwilnych studentow, kotrejž załožba hižo z dźewjećdźesatych lět jako zarjadowar organizuje. Schadowanka w Delnjej Łužicy měješe 40. a schadźowanka w Hornjej Łužicy 150. jubilej. „A dale je so nam, najebać powšitkowneho zjawa falowacych fachowych mocow poradźiło, 4 městna w našim zarjedźe ze serbsce rěčacym kwalifikowanym personalom znowa wobsadźić.“, rjekny Jan Budar.

Za tute lěto je nětko wulki nadawk dalše planowanje projekta Lawskeho areala. 2025 ma so spěchowanska próstwa zapodać. Stupacych twarskich kóštow dla ma załožba nadawk, tute cyłkowne kóšty znižić abo přidatne srědki nawabić.

Najwjetše wužadanje za tute lěto drje budu hospodarske jednanja ze spěchowanymi institucijemi za lěto 2026 a nastajenje wotpowědneho hospodarskeho plana załožby. Wšako njeje jasne, hdy změjemy nowe finančne zrěčenje. Załožba nadźija so tuž, zo so wotpowědne jednanja w nazymje wuspěšnje zakónča a zo je potom jasne, z kelko pjenjezami móža Serbja 2026 ličić.