Cyłkownje 98 próstwow su hač do 30.09.2025 w zarjedźe Załožby za serbski lud dóšli. To su 6 próstwow wjac hač běchu so za 1. połlěto 2025 zapodali. Cyłkowna suma wšitkich zapodatych projektow je 1.769.248,07 eurow, štož je porno lětu 2025 někak 315 tysac eurow mjenje. Załožba nětko internje pruwuje, hač wotpowěduja wone spěchowanskej směrnicy. Po tym w zarjedźe podłožki kaž tež doporučenja za fachowu přiradu nadźěłaja. 
Přirada wo spěchowanju wuradźuje, jeje posedźenje wotměje so 10. nowembra.

Nawodnica teama spěchowanja w załožbje, Nicole Zimmermannec, zdźěli: „Nimo kóždolětnych próstwow wo spěchowanje wuměłskeho nawoda a probowych lěhwow chórow, rejowanskich skupinow, ansamblow a dźiwadłowych skupinow, mamy lětsa tež tójšto nowych projektow, wosebje na polu předstajaceho wuměłstwa. To nas jara wjeseli.“

Za wobłuk nowe medije předleža mjeztym tři próstwy z cyłkownej sumu spěchowanja we wysokosći 470 tysac eurow.