W lěće 2025 steješe za nas jako Załožba za serbski lud předewšěm staw jednanjow k Pjatemu financowanskemu zrěčenju w srjedźišću. Tute zahajichu so hižo w septembrje 2023 a wotměchu so pod přiběrajcy ćežkimi financnymi połoženjemi. Mjeztym su jednanja nimale wotzamknjene, tak zo ma so zrěčenje spočatk 2026 podpisać. Z tym dóstanu naš załožbowy zarjad, wosom institucionelnje spěchowane institucije kaž tež mnohe projektowe předewzaća planowansku wěstotu hač do 2030. Nimo toho hodźa so stupane personalne kóšty zapopadnyć, bjeztoho zo je wottwar dźěłowych městnow trěbny. Tole twori trěbny strukturny zakład, zo bychmy naš centralny nadawk - serbsku rěč a kulturu tež přichodnje witalnje a widźomnje zdźeržeć - naslědnje spjelnić móhli.

Tež we wobłuku digitalizacije móžachmy 2025 čujomne postupy docpěć, wosebje na polu rěčnych technologijow a digitalizacije procesow. Našej wulkej wiziji serbsko-němskeho digitalneho simultaneho přełožowarja slědujo, běchu prěnje testy w praksy wuspěšne. Z tym je serbska rěč porno wulkimaj rěčomaj na polu mašinelneho spóznawanja rěče a awtomatiskeho přełožowanja tekstow jasnje nachwatała. W lěće 2026 budźemy dale na tym dźěłać, zo so datowa baza a z tym na kwalita nałožowanjow polěpša. Dalši wuznamny projekt je zawjedźenje centralneho systema za management dokumentow w pjeć serbskich institucijach, kotrehož zwoprawdźenje ma so 2026 zakónčić. Zaměr je, mnohe so wospjetowace zarjadniske procesy digitalizować a přez to jednorišo a eficientnišo wuhotować.

Spěchowanskej programaj "Serbska rěč a kultura w strukturnej změnje", za kotrejž dóstawamy wot 2022 strukturne srědki Zwjazka, podatej so 2026 do swojeho pjateho lěta spěchowanja. Z tym je přirada za projektowe próstwy w Swobodnym staće Sakskej swoju prěnju legislaturu wotzamknyła a dyrbi so wot 2026 znowa pomjenować. Runočasnje projekty, kotrež buchu w lěće 2022 na dobu pjeć lět přizwolene, nětko wobšěrnje ewaluěrujemy. Tuta ewaluacija ma być fundowany zakład za rozsud, hač so projekty nadal spěchuja.

Tuchwilu najwjetši projekt našeje załožby je twarske předewzaće "Serbski forum wědy na Lawskim arealu". W lěće 2025 móžachmy planowanja tak daloko konsolidować, zo so hornja hranica kóštow dodźerži a su zdobom móžne zwyšenja kóštow wobkedźbowane. Přizwolenje za prěnju spěchowansku periodu předleži, twarska próstwa za prěni twarski wotrězk smy zapodali. Spočatk 2026 ma planowanski naćisk dokónčeny a fachowje wobkrućeny być kaž tež twarska dowolnosć předležeć, tak zo hodźi so w lěću z prěnimi widźomnymi twarskimi dźěłami započeć.

Tež w załožbowym zarjedźe su za lěto 2026 změny předwidźane. Tež w zarjedźe załožby planujemy 2026 někotre změny. Tak smy na zakładźe noweje koncepcije započeli našu webstronu pře- a wobdźěłać - jeje relaunch ma kónc lěta zakónčeny być.

W lěće 2025 spisanu powšitkownu koncepciju komunikacije za Serbow chcemy 2026 dale wuwiwać a zhromadnje z partnerami konkretne naprawy za jeje přesadźenje wudźěłać.
Nimo toho ma so předźěłana spěchowanska směrnica załožby w nalěću 2026 wobzamknyć, kotraž za próstwy wo spěchowanje wot 2027 płaći .

Tež personelnje budźe so w zarjedźe tójšto změnić, dokelž podadźa so lětsa třo na wuměnk. Naslědnistwo tutych městnow je tež hižo internje rjadowane.