Přehlad nowinskich zdźělenkow Załožby
Zakónčacy kolokwij stipendiatow
Budyšin,
Wčera, 19.07.2023 staj stipendiataj Załožby za serbski lud, Karolina Babczuk a Kryštof Peršin na swojim zakónčacym kolokwiju w Serbskim domje w Budyšinje wo swojim slědźenju přednošowałoj. Karolina, studentka bohemistiku z Pólskeje, předstaji jeje projekt "Analyza hornjoserbskich rostlinskich mjenow w Smolerjowych 'Pěsničkach hornich a delnich Łužiskich Serbow'". Kryštof, doktorand z Čěskeje, rěčeše wo přełožkach ruskeje literatury do hornjoserbšćiny w časopisu "Serbowka", kiž wudawaše so srjedź 19. lětstotka na Praskim seminarje. Dźensa wotpołožištaj wobaj hišće swoje rěčne pruwowanje w hornjoserbšćinje (B2 a C1). Karolina wróći so nětko do Pólskeje, zo by tam swój studij pokročowała. Kryštof wostanje Łužicy swěrny, pisa swoje doktorske dźěło a dźěła podźělnje w Rěčnym centrumje Witaj a w Serbskim instituće.
Knjeni Mošowa, zastupjerka direktora załožby, dźakowaše so stipendiatomaj za jeju pilne wědomostne dźěło a wuběrne nawuknjenje serbšćiny, a přeješe jimaj z wutroby wšitko dobreho do přichoda.
Załožba spožča semesterski stipendij za dźělny studij sorabistiki při uniwersiće w Lipsku, přewažnje za studentow z wuchodoeuropskeho wukraja. Prěni króć wuda załožba tutón stipendij za studijne lěto 1996/97, dotal cyłkownje hižo 59 razow.