Myto Ćišinskeho spožča Załožba za serbski lud za wusahowace zasłužby na polu serbskeje kultury, wuměłstwa abo wědomosće. Z nim spomina na klasikarja serbskeje literatury Jakuba Barta-Ćišinskeho (1856-1909). Załožba wěnuje tute myto kóžde druhe lěto wuznamnym wosobinam z Hornjeje a Delnjeje Łužicy.

Spožčenje Myta Ćišinskeho a Spěchowanskeho myta Ćišinskeho je na swjatočnosći dnja 18. oktobra 2025 w Smochčanskim kubłanišću swj. Bena w Smochćicach (pola Budyšina) přewzała knjeni Barbara Klepsch, Statna ministerka za kulturu a turizm Swobodneho stata Sakskeje.

Myto Ćišinskeho 2025 spožči so Měrćinej Weclichej za jeho skutkowanje jako pućrubar serbskeje popularneje hudźby a zaměrne spěchowanje spěwneho dorosta.

Wón wotrosće jako najmłódše wot třoch dźěći na małej žiwnosći w Kukowje. Hižo zahe nawuknje wot maćerje a nana, so tež po šuli gratu přimać. Su žiwi pod hesłom "Dźěłaj a spěwaj", hudźba słuša k wšědnemu dnjej kaž chlěb. Hrać na klawěrje nawuknje w Pančičan klóštrje. Po maturje a wójsku koordinuje kulturne projekty w gmejnskim zwjazku, je redaktor Noweje Doby, hraje w skupinomaj "Tajfun" a wot 1989 profesionalnje w band "Oberland". Tři lěta pozdźišo pak so k žurnalizmej do Serbskich Nowin wróći, doniž so 2020 na wuměnk njepoda.
Jako komponist a spěwar wuwiwaše wot 1990tych lět sem nowu serbsku rěčnu kulturu, dokelž našu rěč na dotal njeznate wašnje zwuraznjenja interpretowaše - ze zabawnej hudźbu, wosebje pak z baladu a šansonom.
A tohorunja wot 1990 sem pyta Weclich zaměrnje spěwne talenty mjez dźěćimi w serbskich a dwurěčnych šulach a młode spěwarki a młodych spěwarjow a jich wuměłske kubłanje spěchuje.
Nimo toho je tworićel mnohich woblubowanych spěwohrow a oratorijow a je zestajał a wudawał 11CDjow.
Zakład jeho skutkowanja je sylna swójska motiwacija, z kotrejž je tež wutworił priwatny kulturny a hudźbny management w Serbach.

Spěchowanske myto Ćišinskeho 2025 spožči so Julianej Nyči za jeho wurjadne zasłužby při zapřijeću serbšćiny a serbowědnych temow w digitalnych medijach.

Julian Nyča narodźi so 1988 w Budyšinje. Po złoženju abitury na Budyskim Schillerowym gymnaziju studowaše na Humboldtowej uniwersiće w Berlinje slawistiku z wosebitym fokusom na južnosłowjanske rěče a kultury.
Po studiju a nawróće do Łužicy skutkowaše mjez druhim jako redaktor serbskeho kulturneho časopisa Rozhlad, jako wědomostny sobudźěłaćer Serbskeho instituta, jako projektowy sobudźěłaćer Rěčneho centruma WITAJ (app "sotra") a jako docent za rěčne kursy serbšćiny. Tuchwilu dźěła w projekće "ZARI - syć za serbsku rěč a regionalnu identitu" jako projektny nawoda za wobłuk rěčneho kubłanja.
Přewažnje čestnohamtsce wěnuje so šěrjenju serbskeje rěče a serbskich wobsahow w digitalnych medijach, wot 2005 je awtor a administrator němskeje Wikipedije a wot 2011 wot njeho natwarjeneje hornjoserbskeje Wikipedije. Mjeztym su něhdźe 4000 fotografijow a grafikow, kotrež je k serbskim temam zhotowił, online wozjewjene.

Wo spožčenju mytow bě kurotorij Myta Ćišinskeho pod nawodom předsydy Załožboweje rady Marka Kowarja 14. junija 2025 rozsudźił.
Wobě myće spožčitej so z wopismom a čestnej jehłu z podobiznu Ćišinskeho. Hłowne myto je z 12.000 eurami dotěrowane, spěchowanske z 4.000 eurami.

kontakt za naprašowanja:
Michaela Mošowa
Załožba za serbski lud
telefon: 03591 550320
m.mosowa@zalozba.de

program za swjatočnosć 
lawdacija lawreatej Myta Ćišinskeho M. Weclichej 
lawdacija lawreatej Spěchowanskeho Myta Ćišinskeho J. Nyči