Franziska Brechowa, społnomócnjena Sakskeho statneho knježerstwa za naležnosće Serbow, wopyta 22.08.25 załožbu w Budyšinje.
W zhromadnej rozmołwje z předsydu załožboweje rady, Markom Kowarjom, a direktorom załožby, Janom Budarjom, běchu předewšěm přihoty Pjateho financneho zrěčenja a wužadaca financna situacija Sakskeje wažna tema. 
Tež wo twarskim projekće "Serbski forum wědy na Lawskim arealu" rěčachu. Knjeni Brechowa rjekny, zo je projekt najebać wšěch zadźěwkow, kotrež hodźa so zmištrować, w planowanjach hižo jara daloko pokročował. Wona podźakowa so direktorej za wuspěšne dźěło. 
Dalše temy běchu studij sorabistiki w Lipsku kaž tež zdobywanje serbskorěčneho fachoweho personala.

Franciska Brechowa je wot meje 2023 nawodnica wobłuka kultura a turizm w Sakskim statnym ministerstwje za wědomosć, kulturu a turizm. W tutej funkciji je tež čłonka Załožboweje rady. Wot 15. apryla 2025 je zdobom społnomócnjena Sakskeho statneho knježerstwa za naležnosće Serbow.