Po tym zo bě so prěni onlinowy rěčny kurs k nawuknjenju delnjoserbskeje rěče 4. meje 2018 w Choćebuzu zjawnosći předstajił, je nowy schodźenk A2 wot dźensnišeho přistupny.

Kurs "A2. Źiwnučki póbratš" wopřija 522 bazowych nadawkow a 270 dalšich zwučowanjow. Zajimcy namakaja rěčny kurs pod internetowej adresu www.sprachkurs.sorbischlernen.de.

Runja hižo w aprylu 2017 zawjedźenemu kursej hornjoserbskeje rěče, bu wón w nadawku Załožby za serbski lud wot fachowcow multimedialneho centruma za nawuknjenje rěčow (MSZ) při Techniskej uniwersiće Drježdźany pod projektowym nawodom dr. Karin Schöne wuwity. Za to stejachu Załožbje přidatne srědki z projekta "Serbska rěč w nowych elektroniskich medijach" swobodneho stata Sakskeje, kraja Braniborskeje a zwjazka k dispoziciji. Wobaj kursaj orientujetaj so sylnje na rěčny certifikat wotpowědnje schodźenkej A1/A2 Europskeho referencneho ramika (GER), kotryž bě Rěčny centrum WITAJ w lěće 2016 zdźěłał.

W srjedźišću schodźenka A2 steja konkretne jednanja a situacije wšědneho dnja, kaž n.př. planowanje jězby, wujasnjenje problemow nastupajo bydlenja z domownikom, bjesadowanje wo nalady a chorosćow, přihotowanje swjedźenja a wotrěčenje terminow, zhromadne warjenje a dalše.

Porno mnohim dialogam skići kurs awtentiske přikłady za słuchanje a čitanje kaž recepty, powěsće wo wjedrje a sporće, ale tež ludowe spěwy.

Dalše fakty w zjeću:

• wobšěrny słowoskład za wuknjenje z wjac hač 1800 wokablemi,
• wšitke dialogi a teksty k poskanju nahrawachu so wot znatych, maćernorěčnych rěčnikow (wobjim wotpowěduje někak dołhosći 2 awdijoCDkow),
• mnoholičbny poskitk hrow ke skrućenju słowoskłada, mjez druhim kwisowe hry a puzzle,
• přez 60 nadawkow za zwučowanje wurjekowanja a někak 280 gramatiskich nadawkow,
• mnoho mjeńšich a wjetšich mytowanjow a digitalnych wulětow do Delnjeje Łužicy.

Paralelnje k wuwiću schodźenka A2 je so tež schodźenk A1 w delnjoserbšćinje dale wuwił. K nowostkam słušeja wersija za smartphony, mjezyfeedback a dalša, staflowana pomoc za wuslědki. K mnoho nadawkam hodźi so dalše koło a z tym přidatne pisomne zwučowanje spjelnić.

Wšitke teksty buchu přiměrjene na nowe rjadowanje pisanja pismika "ŕ" (wobzamknjenje delnjoserbskeje rěčneje komisije wot meje 2018).

Na zakładźe dalšich přidatnych srědkow z projekta "Serbska rěč w nowych elektroniskich medijach" je dalewuwiće schodźenka B1 delnjoserbskeho rěčneho kursa hač do kónca 2020 zaručene.