W Parisu wotměwa so tuchwilnje mjezynarodna konferenca Unesco „Language technologies for all“. Społnomócnjeny za digitalizaciju pola Załožby za serbski lud Daniel Zoba a Ivan Kraljevski z Fraunhoferoweho instituta za keramiske technologije a systemy IKTS Drježdźany staj sej tam zhromadnje dojěłoj. Jeju prezentacija na konferency w Běłohrodźe w nowembrje běše organizatorow konferency tehdy tak přeswědčiła, zo su Ivana Kraljevskeho na tutu konferencu přeprosyli. „Ivan je so jara přez tute přeprošenje wjeselił, wšako je to připóznaće našeho dźěła, dokelž směš jenož z přeprošenjom swoje wuslědki prezentować. Wón pak nochcyše so bjez reprezentanta Serbow wobdźělić, a tuž sym sobu tu a wužiju składnosć so z druhimi mjeńšinami skontaktować.“ tak Daniel Zoba.

Za konferencu je Daniel Zoba zestajał poster ze wšěmi rěčnymi technologijemi, kotrež hižo za serbšćinu eksistuja. K tomu słuša mjez druhim soblexx, sotra ale wosebje awtomatiske spóznawanje rěče, wo čimž Ivan Kraljevski wutoru při prezentaciji plakatow rozprawja. Daniel Zoba rjekny: „Nadźijam so, zo změjemy składnosć wosebje tež kontakty k wulkim firmam kaž Meta abo Google natwarić a zo dóstanjemy hišće pokiwy druhich, zo bychmy našu technologiju hišće polěpšić móhli.“