Nazymske posedźenje Załožboweje rady Załožby za serbski lud wotmě so tónraz w Budyskim Serbskim domje pod nawodom předsydy Załožboweje rady, Marka Kowarja.

 Dypki dnjoweho porjada běchu mjez druhim hospodarski plan załožby 2026, spěchowanska směrnica załožby, strukturne srědki po § 17 čo. 31 InvKG w Swobodnym staće Sakska a staw planowanja "Serbski forum wědy při Lawskim arealu".

Hospodarski plan 2026

Byrnjež financne zrěčenje za załožbu kónc lěta wuběžało a nowe hišće podpisane njebyło, je Załožbowa rada hospodarski plan załožby za lěto 2026 schwaliła. Z tym je dalše financowanje institucijow a projektow klětu najprjedy zawěsćene.

Hospodarski plan wobsahuje tež srědki za dźěłowe městna, kotrež su dotal hač do kónca 2025 wobmjezowane, tak zo je financowanje tutych najprjedy hač do 30.06.2026 zaručene. Rozsud wo pokročowanju twori rada ručež Pjate financne zrěčenje předleži.

Předźěłanje spěchowanskeje směrnicy

Tuchwilu spěchowansku směrnicu Załožby za serbski lud w zarjedźe wobšěrnje předźěłuja. Mjez druhim chcedźa nowe temy zadźěłać.

Tak měło so na přikład spěchowanje nošerskich podźělow resp. přiražki za zawodne kóšty wšitkim serbskorěčnym a dwurěčnym dźěćacym dnjowym přebywanišćam zmóžnić. Zakład za spěchowanje su objektiwne kwalitne kriterije nastupajo wuměnjenjow za imersiwne přiswojenje serbskeje rěče. Wo wotewrjenych prašenjach nastupajo zaměrow spěchowanja, zwoprawdźenja kaž tež k financnemu planowanju budźe Załožbowa rada lětnim posedźenju 2026 hišće raz poradźować.

Załožbowa rada dale podpěrowaše, zo maja so do noweje spěchowanskeje směrnicy skrótšene časowe doby za zapodaće próstwow za małe projekty přiwzać.

Strukturne srědki wotpowědnje § 17 čo. 31 InvKG w Swobodnym staće Sakskej

Slědujo doporučenju přirady k spěchowanskemu programej "Serbska rěč a kultura w strukturnej změnje" za projekty w Swobodnym staće Sakskej, wobzamkny załožbowa rada, zo so projekt Towarstwa za hajenje regionalneje kultury srjedźneje Łužicy z.t. "Drasta digitalnje V: herbstwo" (Serbske drasty jako digitalne kulturne herbstwo), pod wuměnjenjom korektury etata 2026, w lětach 2026 do 2030 spěchuje.

Zaměr projekta je, zo so serbska drastowa kultura sakskeje Łužicy w digitalnej dobje zawěsći, dokumentuje a za šěroki publikum dožiwjomne sčini. We wuskim zhromadnym dźěle z nošerkami narodneje drasty, šwalčemi, wědomostnikami a kulturnymi institucijemi, so typiske regionalne drasty trojodimensionalnje rekonstruuja, wjacerěčnje dokumentuja a přez interaktiwnu, bjezbarjerowu webplatformu zjawnje spřistupnja.

Zapodaty projekt "LIPA - Lusatian Information, People & Arts" Bena Brězana so projektowemu nošerjej wróći, zo by jón hišće dale předźěłał.

Planowanski staw "Serbski forum wědy při Lawskim arealu"

Załožbowa rada připóznawa přeplanowanje "Serbskeho foruma wědy při Lawskim arealu", kotrež bě trěbne, zo bychu so cyłkowne kóšty na 47,5 mio. EUR redukowali. Hornja hranica kóštow wostanje dale 50,0 mio EUR. Diferenca słuži jako pufer jeli zo kóšty stupaja. "Na posedźenju załožboweje rady bu dobre a swědomite dźěło załožboweho zarjada eksplicitnje wuzběhnjene. Zamołwite nadawki, kotrež so zmištruja a rozsudy, kotrež dyrbja so tworić, su enormne nałožby časa a mocow nimo poprawneho dnjoweho dźěła", wupraji so předsyda załožboweje rady Marko Kowar chwalobnje.

Po aktualnym stawje planowanja twarskeje naprawy bu twarska próstwa za twarski wotrězk 1 (Hillerschowy ansambl) 06. nowember 2025 w Budyskim měšćanskim zarjedźe zapodaty. Hač do kónca tutoho lěta ma so redukowanje kóštow w twarskim wotrězku 2 (nowotwar Lawskich hrjebjow, póstownja) do planowanjow zadźěłać. Změnjeny twarski plan so potom pola Sakskeho imobilijoweho a twarskeho managementa (SIB) zapoda za wospjetne twarsko-fachowe pruwowanje.

Załožbowa rada legitimowaše direktora załožby nimo toho, zo smě wukonowu fazu 5 wuwjedźenskeho planowanja za 1. twarski wotrězk (wottorhanje Lawskich hrjebjow 8 a twarske jamy) zahajić, po wobkrućenju dospołnosće twarskeje próstwy a twarskich předłohow. Tole je trěbne, zo by archeologija dosć chwile měła, wuzběhowacu twarsku jamu přepytować.