Pjate financne zrěčenje je podpisane a prawnisce płaćiwe

Załožbowa rada Załožby za serbski lud schadźowaše so wutoru na swojim nalětnim posedźenju w twarjenju Sakskeho statneho ministerstwa za wědomosć, kulturu a turizm (SMWK) w Drježdźanach. W předpolu posedźenja bu pjate zrěčenje wo zhromadnym financowanju Załožby za serbski lud předsydźe Załožboweje rady, Markej Kowarjej, oficialnje přepodate. Zrěčenje su w aprylu Zwjazkowy minister za nutřkowne, Alexander Dobrindt, kaž tež Ministerskej prezidentaj Swobodneho stata Sakskeje, Michael Kretschmer, a Kraja Braniborskeje, Dietmar Woidke, podpisali.

Jednanja wokoło financneho zrěčenja zahajichu zamołwići hižo w lěću 2023 pod nawodom zwjazkoweho ministerstwa nutřkowneho. Wuslědk je tajki, zo su přiražki tak přiměrjene, zo stej dalewobstaće załožby a jeje dźěło za serbsku rěč a kulturu hač do 2030 zaručenej. Financielna podpěra wučinja za 2026 cyłkownje 29.256,0 TEUR, za lěta 2027 do 2030 předwidźi zrěčenje lětnje zwyšenje spěchowanskeje sumy jako wurunanje stopnjowanja kóštow. Kaž dotal financuje Zwjazk wot cyłkowneje sumy tři šesćiny, Swobodny stat Sakska dwě šesćinje a kraj Braniborska šesćinu.

„Přiměrjenje přiražkow nam zmóžnja, w minjenych lětach etablěrowanu zestawu serbskich zarjadnišćow a projektow zachować, bjeztoho zo dyrbimy personal wottwarić. Z tym móžemy so tež přichodnje zaměrej załožby přiměrjene wotpowědować.“, rozjasnja direktor załožby, Jan Budar.

Předsyda Załožboweje rady, Marko Kowar, wudospołnja: „Załožbowa rada ma nětko nadawk, w přichodnych lětach z pomocu tuchwilnych srědkow dobre a zamołwite rozsudy tworić, zo by přez lěto 2030 wobšěrne nadawki k zachowanju serbskeje rěče, kultury a identity zdokonjała."

Załožbowa rada wobzamkny dalewjedźenje wot 2021 wutworjenych wobmjezowanych městnow a zawěsćenje financnych srědkow hač do 2030. Zo bychu objektiwny zakład za rozsud k dalewjedźenju měli, buchu wobmjezowane městna 2024 přez eksternu ewaluaciju přepruwowane a jich trěbnosć w přichodźe bu wobkrućena.

Za „Serbski forum wědy při Lawskim arealu“ smědźa so nětko prěnje wupisanja spřihotować. Ručež za 1. twarski wotrězk („Hillersches Ansambl") twarska dowolnosć předleži a wupisanske podłožki pokazaja, zo je kóštowy ramik dodźeržany, smě direktor wotpowědnje schwalenemu wobzamknjenju prěnje wukony wupisać a społnomócnić. Tak móža najskerje hišće lětsa započeć, kózły a marodne wjerchi drjewjanych hrjadow wotstronjeć a narunać. Za 2. twarski wotrězk (póstownja, nowotwar) tuchwilu twarsku próstwu přihotuja. Ručež dźělna dowolnosć předleži, móže so zwottorhanje twarjenja na Lawskich hrjebjach 8 spřihotować. W tutym zwisku smě so tež twarska jama wuzběhnyć, zo móhło so z archeologiskimi přepytowanjemi započeć.

Załožbowej radźe su dźensa tež staw digitalizowanskich projektow prezentowali. Po tym zo je so techniska přewjedźomnosć spóznawanja rěče a mašinelneho přełožka tekstow docpěła, stejitej nětko polěpšenje kwality a za to trěbne zběranje rěčnych datow w srjedźišću. Na zakładźe relewantnych nałožowanjow (na př. chatbotow, přełožowanskich posłužbow, kubłanskich poskitkow) ma so hač do nazymskeho posedźenja pruwować, kotre kwantitatiwne, wobsahowe a wužiwanskoprawniske potrjeby za dalšu akwizu hornjo- a / abo delnjoserbskich rěčnych datow, kotrež su za trening tutych nałožowanjow trěbne, wobsteja.

Załožbowa rada wza wuwićowy koncept za Ludowe nakładnistwo Domowina tzwr na wědomje, tola žadaše sej wudospołnjenje koncepta wo wobsahowym wusměrjenju nakładnistwa a k priorizowanju w koncepće předwidźanych naprawow.

Dalše dypki dnjoweho porjada zaběrachu so z temami kaž pomjenowanjom nowych sobustawow přirady za spěchowanski program „Serbska rěč a kultura w strukturnej změnje" za projekty w Swobodnym staće Sakskej a z wuwićom rěče w załožbowym zarjedźe a spěchowanych zarjadnišćach.

protokol wobzamknjenjow