Koleginy serbskeju kulturneju informacijow po puću
Rozprawa wo jich dźěławosći zwonka kulturneje informacije

Serbska kulturna informacija LODKA bě w minjenych tydźenjach na wšelake zarjadowanja přeprošena a w Choćebuzu a wokolinje po puću.
Wosomnaće studentow geografiskeho instituta uniwersity Mainz witaštej koleginje LODKI 27.02.26 w Serbskim domje. Na ekskursiji, kotraž běše jich do Łužicy wjedła, rozestajachu so intensiwnje ze serbskej kulturu. Mjez druhim słyšachu přednošk Mileny Stockoweje z LODKI a Měta Nowaka, wědomostneho sobudźěłaćerja w Serbskim instituće we wotrjedźe za regionalne wuwiće a škit mjeńšin.

Štwórtk, 26.03.26, měješe Milena Stockowa w Grodkowskim Serbskim kolektiwnym běrowje přichodny přednošk.  Tutón zarjadowa so do rjada přednoškow na temu „Serbske institucije w Delnjej Łužicy, jich nadawki a zaměry ”, na kotryž Šula za delnjoserbsku rěč a kulturu přeprošuje. Wobdźělnicy běchu jara zajimowani, mějachu tójšto prašenjow a wudachu so dobre rozmołwy. Běše to lětsa hižo třeće zarjadowanje tajkeho razu, po tym zo poby M. Stockowa w Lubinje (Błóta) a Baršću (Łužica).

Wutoru, dnja 31.03.26 bě LODKA z hosćom pola maltezow w Choćebuzu. Sandra Mählojc přednošowaše na temu „Jutry w Serbach ” a poda přehlad jutrownych nałožkow. Runočasnje móžachu wobdźělnicy sami jutrowne jejka w bosěrowanskej abo wóskowanskej technice debić a nawuknjene hnydom nałožować. Knježeše čiła wuměna wo nastatych małych wuměłskich twórbach, mustrach a jich woznamach.

Njedźelu, 12.04.2026 wotmě so při Pisanym dwórnišću w Choćebuzu wospjet serbski swjedźeń „Małe jatšy ”, kotryž organizowaše Delnjoserbska kulturna akademija. Nimo wobšěrneho programa,hudźby a rejow na jewišću mějachu tam tež rjemjeslniske wiki. LODKA bě z informaciskim stejnišćom zastupjena. Wopytowarjo běchu dobreje nalady a zajimowani, něšto wo serbskej kulturje a jutrownych nałožkach zhonić.

Tež pućowansku wustajeńcu LODKI „Jutry w Serbach” su sej lětsa wjacekróć wuspožčili, kaž ludowa uniwersita w Radebeulu, ewangelska cyrkej w Slepom, nakupowanišćo Blechen-Carré w Choćebuzu abo Haasowske towarstwo. Tam su ju w bróžni na swójbnym popołdnju k natwarili.

Serbske jutrowne tradicije žiwje posrědkowali - rozprawa wo aktiwitach Serbskeje kulturneje informacije w Budyšinje

W dobje wot 22. februara hač do 20. apryla je tež Serbska kulturna informacija (SKI) w Budyšinje mnohostronski program kołowokoło serbskich jutrownych tradicijow na nohi stajiła.

Centralny wobstatk aktiwitow bě cyłkownje dźesać dźěłarničkow za debjenje serbskich jutrownych jejkow. Tute zarjadowanja měrjachu so na rozdźělne cilowe skupiny, běchu zdźěla zjawne, ale tež indiwidualnje skazane, kaž za rjadownje a pěstowarnje a zwjetša přewodźachu je nimo koleginow ze SKI tež eksterne fachowče. Tak sposrědkowachu hosćom žiwje tradicionalne techniki a pozadki wo kulturnym wuznamje wuměłsce wuhotowanych jejkow. Zajim za dźěłarnički bě wulki, wone běchu jara derje wopytane a zwjetša samo spěšnje wuknihowane.

Nimo toho je so SKI aktiwnje na jutrownych wikach w Budyšinje kaž tež w zastupnistwje Swobodneho stata Sakskeje pola Zwjazka w Berlinje wobdźěliła. Tam prezentowachu serbske nałožki šěrokej zjawnosći a přinošowachu k widźomnosći a hódnoćenju serbskeje kultury zwonka regiona.

Cyłkownje je doba do jutrow w kulturnymaj informacijomaj jara dźěłointensiwna – předawachu so na přikład přez 1.000 jutrownych jejkow, wjele wóska a sety za samostatne debjenje jejkow a wudachu so njeličomne informacije wo Serbach we wšelakich rěčach.  Zdobom pak je tutón čas bohaty na zetkanja a dobrych rozmołwach w kotrychž so často poradźi, wědu wo našim ludźe šerić, serbsku kulturu šěrokemu publikumej zbližić a kołowokoło serbskich jutrow tež tradicionalne rjemjesło posrědkować.