Z noweho šulskeho lěta płaća druhe rjadowanja za spěchowanje internatneho městna. Próstwa wo spěchowanje přebyća w internaće ma so hižo do toho, zo so zrěčenje z internatom wotzamknje, pola Załožby za serbski lud zapodać. Formular za tute spěchowanje je wot dźensnišeho na stronje formularow załožby přistupny. Přiražka za internat so potom dwójce wob lěto wupłaći. Cil tutych změnow je, zo so proces spěchowanja za wšitkich zjednori.

W tutym zwisku je Załožbowa rada w poslednim posedźenju změnu směrnicy za spěchowanje projektow wobzamknyła. Wona wobkrući, zo hrajetej Serbskej gymnazijej w Budyšinje a Choćebuzu wosebitu rolu za zdźerženje a dalewuwiće serbskeje rěče. Internataj tworitej wažny rěčny rum za šulerki a šulerjow. Załožba za serbski lud spěchuje 90 % cyłkownych kóštow za přebywanje. Zbytne 10 % maja starši jako swójski podźěl płaćić. Wuměnjenja za to su, zo šulerka resp. šuler wotydźenja přewažnje w internaće přebyła, so na zhromadnosći a zwonkašulskich poskitkach ze serbskim poćahom wobdźěluje a zo so mjez sobušulerjemi a kubłanskim personalom serbuje.

Přehlad změnow

• próstwa wo spěchowanje ma so online a hižo do wotzamknjenja zrěčenja z internatom stajić
• spěchowanje je we wysokosći 90 % kóštow móžne
• přiražka so jenož hišće dwójce wob lěto wupłaći (cyłkownje jónu za prěnje a jónu za druhe šulske połlěto), za to ma so dalši formular wupjelnić a wobkrućenje šule a internata zapodać

Wšitke informacije wo spěchowanju přebywanja w internaće namakaće tež na tutej podstronje.

Formular za próstwu wo spěchowanje

• wotkaz na formular za stajenje próstwy wo přiražku k wudawkam za přebywanje w internaće Serbskeho gymnazija

Maće-li prašenja, zazwońće runjež na nas, abo napisajće mejlku. 
kontakt:
Roswita Šustrowa
telefon: 03591 550-313
r.sustrowa@zalozba.de