Hač do štwórtka, 31.07.2025, su do załožboweho zarjada dohromady dóšli 32 próstwow wo spěchowanje za lěto 2026.

Su to hłownje próstwy za wulkoprojekty, potajkim ze spěchowanskim wolumenom nad 10 tysac EUR.

Mjez próstwami su tajke wo podpěru za zwoprawdźenje wjetšich zarjadowanjow. Domowinska župa Jakub Lorenc-Zalěski planuje na přikład 10. mjezynarodny dudakowy festiwal 2026 a Serbske šulske towarstwo SŠT je zapodało próstwu wo spěchowanje rěčneju lěhwow za dźěći a młodostnych. Nimo toho dóńdźechu 3 próstwy za projekty we wobłuku nowe medije.

Cyłkownje su próstwarjo wo někak 1,9 mio. eurow spěchowanja prosyli. Porno lońšemu su to někak 10 próstwow a 300 tysac EUR mjenje.

W nowembrje zeńdźe so fachowa přirada za projektowe spěchowanje a budźe wo zapodatych próstwach wuradźować.

Tež za sakski spěchowanski program "Serbska rěč a kultura w strukturnej změnje" je 5 nowych próstwow dóšło, po tym zo su wobdźěłarki srědkow 2024 na wšelakich informaciskich zarjadowanjach hišće raz intensiwnje za program wabili. We wobłuku spěchowanja w strukturnej změnje su definowane 4 ćežišća, kotrymž maja so wšitke próstwy přirjadować. Tute poćahuja so na rěč, na medijowu produkciju a digitalne rěčne technologije, na regionalnu identitu kaž tež na turistiske a hospodarske dohódnoćenje kulturneho herbstwa.

Nowe zapodate próstwy podatym narokam wotpowěduja a hižo eksistowace projekty tematisce wudospołnjeja.

Za spěchowanski program "Serbska rěč a kultura w strukturnej změnje" powołana přirada, zestaja so z wšelakich akterow spěchowanskeho regiona. Tuta ma nětk zapodate próstwy pruwować a doporučenja k spěchowanju za Załožbowu radu sformulować. Kónc nowembra Załožbowa rada wo spěchowanju rozsudźi.

kontakt za naprašowanja:
Nicole Zimmermannec, tel.: 03591 550-318, n.zimmermannec@zalozba.de (za spěchowanje załožby)
Michaela Mošowa, tel.: 03591 550-320, m.mosowa@zalozba.de (za spěchowanje ze strukturnych srědkow)