Załožba za serbski lud a jury wubědźowanja idejow 2025 stej najlěpše projektowe ideje mytowałoj. Na swjatočnym mytowanskim zarjadowanju pjatk, dnja 14.11.2025 na žurli Serbskeho doma w Budyšinje, stej mytowanske pjenjezy wozjewiłoj a idejedawarjam wjele wuspěcha při zwoprawdźenju swojich projektow přałoj. 

Wubědźowanje idejow "Rěč zwjazuje. Rěc zwězujo. Sorbisch verbindet." je załožba lětsa hižo třeći raz wupisała. Za mytowanje a z tym zwoprawdźenje projektow stejachu 2025 cyłkownje 70.000 EUR k dispoziciji: 6 x 1.000,00 EUR, 4 x 3.500,00 EUR, 4 x 5.000,00 EUR a 3 x 10.000,00 EUR. Nadawk zapodaća wubědźowanja pohódnoćić, měješe wot Załožby za serbski lud powołana 12-čłonska jury. Z dohromady 50 we wubědźowanju zapodatych projektow je jury 17 najlěpšich projektow wuzwoliła. Najwyše myta we wysokosći 10.000 € su sebi wudobyli Stary farski dom we Wulkich Dobrynjach z. t. za projekt "Nowy start! - Rěd zarědowanjow z cytanim, koncertom, kinom ...", Daniel Mirtschink za projekt "SorbPOI - digitalny POI-wjednik za sydlenski rum Serbow" a Serbska zakładna a wyša šula Radwor za projekt "Serbowaca zahrodka - městno za imersiwne zanurjenje do serbšćiny". 

Dr. Anja Pohončowa, jedna z třoch předsydow jury, wuzběhnje w swojej narěči na zarjadowanju, zo je wubědźowanje pokazało, zo chowaja so we Łužicy mnohe kreatiwne a inowatiwne ideje za spěchowanje serbskeje rěče. Z nałožowanym scoring-modelom pohódnoći jury kriterije kaž kreatiwnosć, jasnosć programatiki, regionalnu abo nadregionalnu skutkownosć, aktualnosć temy, wužiwanje synergijow a hač je projekt dołhodobnje wusměrjeny. Dwójnu wahu měješe wusměrjenje projekta na zesylnjenje serbskeje rěče a identity w zjawnosći abo w zhromadnym žiwjenju z njeserbskej ludnosću. Jury wupraji swoju zahoritosć, zo telko ludźi w cyłej Łužicy sej mysle čini wo móžnosćach, nałožowanje serbskeje rěče w zjawnosći podpěrać a zesylnić. Wulka ličba projektnych idejow z Delnjeje Łužica swědči wo tamnym angažemenće, wosebje wohroženu delnjoserbšćinu wobchować chcyć. 

Załožba za serbski lud, jako organizatorka wubědźowanja, a jury dźakowaštaj so wšěm wobdźělnicam a wobdźělnikam wubědźowanja za jich ideje, z tym za jich prócowanja wo serbsku rěč a kulturu. Mytowanje hudźbnje wobrubiłoj staj Syman Hejduška a Hanka Rjelcyna, kotrejž běštaj zdobom z knjeni Dr. Anju Pohončowej předsydaj jury.

Załožba připowědźi přichodne wubědźowanje idejow "Rěč zwjazuje. Rěc zwězujo. Sorbisch verbindet." za lěto 2028. Wubědźownaje idejow je spěchowanski instrument, kotryž projektowe spěchowanje załožby wudospołnja, a wusměrja so wosebje na to, ideje a iniciatiwy spěchować, kotrež originelnje a směrodajnje na serbstwo skedźbnja. 

Wšě informacije wo wubědźowanju namakać pod Wubědźowanje idejow a lisćinu 17 mytowanych idejow jako pdf pod Lisćina mytowanych