Załožba za serbski lud a jury wubědźowanja stej najlěpše projektowe ideje mytowałoj. Na swjatočnym mytowanskim zarjadowanju pjatk, dnja 17.11.2023, stej mytowanske pjenjezy wozjewiłoj a idejedawarjam wjele wuspěcha při zwoprawdźenju swojich projektow přałoj.

Najlěpše hódnoćenja docpěchu rěčne projekty z Delnjeje Łužicy, hdźež hrozy, zo so serbska rěč -delnjoserbšćina - zhubi<s>ć</s>, dokelž so ličba maćernorěčnych pomjeńši a je lědma nowych rěčnikow. A tež šulski system je jenož zdźěla kmany, tomu ze młodymi rěčnikami zadźěwać.

Tak chce n. př. gmejna Dešno-Strjažow koncept za natwar serbskeho "rěčneho hnězda" nadźěłać a dotal njesaněrowane twarjenje někak 150 lět stareho gmejnskeho štyristronskeho statoka Nowakec zwužitkować a tak puće wotkryć, što móže gmejna přez wutworjenje serbskeho zarjadowanišća přinošować za rewitalizaciju delnjoserbskeje rěče a jeje widźomnosć.

Domowinska župa Delnja Łužica z. t. chce koncept za imagowu kampanju za delnjoserbšćinu w kraju Braniborskej nadźěłać. Imagowa kampanja ma na pozitiwne nazhonjenja imagoweje kampanje w Swobodnym kraju Sakska "Sorbisch? Na klar." nawjazać, so z prašenjom hódnoty delnjoserbšćiny rozestajeć - nic jenož za Serbow samych, runje tak za komuny, wokrjesy, kraj Braniborska, towaršnosć scyła, zwjazanosć a měrliwu zhromadnosć.

Wubědźowanje idejow "Rěč zwjazuje. Rěc zwězujo. Sorbisch verbindet." je załožba po prěnim nakładźe w lěće 2021 dnja 22.05.2023 druhi króć wupisała. Wubědźowanje je spěchowanski instrument, kotryž projektowe spěchowanje załožby wudospołnja, a wusměrja so wosebje na to, ideje a iniciatiwy spěchować, z kotrymiž móže so originelnje, regionalnje skutkownje, směrodajnje a widźomnje na serbstwo skedźbnić. Wosebity wuznam ma při tym dwurěčnosć Łužicy.

Towarstwa, institucije, komuny, priwatne wosoby atd. móžachu hač do 25.07.2023 swoje projektowe ideje zapodać.

Cyłkownje 70.000 EUR stejachu za mytowanske pjenjezy, kotrež maja so za zwoprawdźenje wotpowědnych projektow zasadźić, k dispoziciji: 6 x 1.000,00 EUR, 4 x 3.500,00 EUR, 4 x 5.000,00 EUR a 3 x 10.000,00 EUR.

Nadawk, zapodaća wubědźowanja pohódnoćić, měješe wot Załožby za serbski lud powołana 12-čłonska jury, w kotrejž běchu Serbja a so za serbstwo angažowace wosoby z cyłeje Łužicy a wšelakich wobłukow serbskeho kulturneho žiwjenja zastupjeni. Z cyłkownje 50 zapodaćow mějachu so 17 projektowe ideje wuzwolić, kiž so z mytowanskimi pjenjezami hódnoća.

Při pohódnoćenju je so procedura pohódnoćenja z dypkami nałožowała. Ze zakładom běchu při tym do toho postajene pohódnoćenske kriterije.

Po rozsudnym posedźenju jury dnja 13.09.2023 je Załožba za serbski lud wšě 17 za mytowanje wuzwolene projektowe ideje bjez informacije wo mytowanskich pjenjezach wozjewiła.

Wšě 17 projektowe ideje inkluziwnje mytowanske pjenjezy hlej prošu tule a wjac informacijow hlej na našej internetnej stronje za wubědźowanje.

Livestream zarjadowanja namakaće pod:
https://vimeo.com/event/3888661/embed

Fota: Hanka Šěnec