Myto Ćišinskeho spožča Załožba za serbski lud za wusahowace zasłužby na polu serbskeje kultury, wuměłstwa abo wědomosće. Z nim spomina so na klasikarja serbskeje literatury Jakuba Barta-Ćišinskeho (1856-1909). Załožba wěnuje tute myto kóžde druhe lěto wuznamnym wosobinam z Hornjeje a Delnjeje Łužicy.

Spožčenje Myta Ćišinskeho a Spěchowanskeho myta Ćišinskeho přewozmje na swjatočnosći dnja 14. oktobra 2023 w 16 hodź. w Smochčanskim kubłanišću swj. Bena w Smochćicach knjeni Natalie Pawlik, społnomócnjena zwjazkoweho knježerstwa za prašenja wusydlencow a narodnych mjeńšinow.

Myto Ćišinskeho 2023 spožči so Jurjej Łušćanskemu za jeho mnohostronske płódne kulturne a wuměłske skutkowanje a za wobstajne wudźeržowanje stykow k słowjanskim susodam na dobro serbskeho ludu.

Jurij Łušćanski narodźi so 1951 w Njebjelčicach. Pozdźišo sta so z kapałnikom při Drježdźanskej Dwórskej cyrkwi, wukubła so na pismikistajerja w Budyšinje a bu bórze spěwar w Serbskim ludowym ansamblu. Po tym studowaše na Wysokej šuli "Carl Maria von Weber" w Drježdźanach klasiski spěw. Z lěta 1979 dźěłaše w Berlinje jako hudźbny redaktor telewizije NDR. 1992 wróći so do Łužicy a nastupi dźěło w Domowinskim zarjedźe, spočatnje jako referent za "zjawnostne". Pozdźišo bě hač do toho, zo poda so na wuměnk, zamołwity za wobłuk "kulturne naležnosće a wukraj".

Spěchowanske myto Ćišinskeho 2023 spožči so Gregorej Kliemej za jeho kreatiwne a zahorjace kulturne dźěło, za zamóžnosć, wšitke generacije zwjazować kaž tež inowatiwne hudźbne projekty zeskutkownjeć.

Gregor Kliem je so w lěće 1990 do serbsko-němskej swójby w Choćebuzu narodźił. Kliemec staršej staj hudźbne zajimy syna wot cyłeho spočatka podpěrałoj. Hižo jako 4-lětny hólc započa wukubłanje na Choćebuskim konserwatoriju. Lěto pozdźišo je zamóhł piskać na flejće, potom so spěšnje za akordeon rozsudźi. Wot pjateho lětnika wuknješe Gregor Kliem we wukonowej profilowej rjadowni na Delnjoserbskim gymnaziju w Choćebuzu, hdźež je 2009 swoju abituru złožił. Wot lěta 2010 studowaše tři lěta na uniwersiće w Lipsku hudźbne wědomosće. Tomu sćěhowali su tři dalše studijne lěta w Halle nad Solawu na Martin-Lutherowej uniwersiće za hudźbnu etnologiju.

Gregor Kliem je hudźbnik, hudźbny wědomostnik z ćežišćom "hudźbna etnologija " a dźěła jako hudźbny a kulturny redaktor w serbskej redakciji rbb.

Wo spožčenju mytow bě kurotorij Myta Ćišinskeho pod nawodom tehdyšeje předsydki Załožboweje rady Susann Šenkec 2. meje 2023 rozsudźił.

Wobě myće spožčitej so z wopismom a čestnej jehłu z podobiznu Ćišinskeho. Hłowne myto je z 12.000 eurami dotěrowane, spěchowanske z 4.000 eurami.