Myto Ćišinskeho 2025 Załožby za serbski lud spožči so w nazymje (18. oktobra 2025) Měrćinej Weclichej za jeho skutkowanje jako pućrubar serbskeje popularneje hudźby a zaměrne spěchowanje spěwneho dorosta.

Spěchowanske myto Ćišinskeho 2025 spožči so Julianej Nyči za jeho wurjadne zasłužby při zapřijeću serbšćiny a serbowědnych temow w digitalnych medijach.

Tole rozsudźi kuratorij k spožčenju Myta Ćišinskeho na swojim posedźenju wčera, 4. junija 2025 w Budyšinje.

Swjatočnosć k spožčenju mytow budźe 18. oktobra 2025 w Smochčanskim kubłanišću swj. Bena. Přitomny budźe tež zastupjer knježerstwa Sakskeje, kaž předsyda kuratorija Marko Kowar zdźěli.