Załožba za serbski lud je 20. februara wubědźowanje idejow „Rěč zwjazuje. Rěc zwězujo. Sorbisch verbindet. 2025“ wupisała. Z wubědźowanjom podpěruje wona projekty, kotrež so na originelne wašnje ze serbskej rěču a kulturu zaběraja – wosebje tajke, kotrež serbsku identitu w zjawnosći a w zhromadnym žiwjenju z njeserbskej ludnosću zesylnja.

Towarstwa, komuny, institucije, priwatne wosoby a druzy nošerjo móžachu swoje projektne ideje hač do 16. meje zapodać. 

Kotre wot cyłkownje 50 zapodatych idejow měła Załožba z mytowanskimi pjenjezami wuznamjenić, je 12-čłonska jury na swojim posedźenju 5. awgusta dorozsudźiła. W cyłku je wona 17 projektow za mytowanje wuzwoliła, kotrež su w procedurje pohódnoćenja z dypkami najwjace dypkow dóstali.

Do rozsuda je sej jury wšitke 50 zapodaćow wobhladała a wo projektach wuradźowała. Po tym je kóždy čłon jury jednotliwe projekty po wěstych kriterijach sam za sebje pohódnoćił.

Cyłkowne pohódnoćenje jury, kotrež je wona 5. awgusta wobkrućiła, je zakład za załožbu, za někotre z wuzwolenych projektow połnu wočakowanu přiražku za realizowanje přizwolić. Nastupajo někotre dalše projekty so załožba ze zapodarjemi dorozumi, hač a kak móža planowanu naprawu z nišimi mytowanskimi pjenjezami, hač su wočakowali, zwoprawdźić.

Załožba dowoli kombinaciju mytowanskich pjenjez z projektnym spěchowanjom a zmóžni z tym realizowanje wšěch projektow, kotrež je jury we wubědźowanju na zakładźe kwalitatiwnych faktorow jako najlěpše posudźowała. 

Statement jury:

„Běchmy pozitiwnje překwapjeni hladajo na mnóstwo zapodatych projektow, wosebje pak wo wšelakorosći idejow, a to ze wšěch regionow Łužicy. Je zwjeselace, zo telko ludźi sej mysle čini wo tym, na kajke wašnje by so nałožowanje serbskeje rěče w zjawnosći podpěrać móhło. W srjedźišću našeho rozsuda stejachu nowe a wusahowace ideje.” 

Sćěhowace projekty su so za mytowanje wuzwolili:

• Serbowaca zahrodka (Serbska zakładna a wyša šula Radwor)
• SorbPOI – digitalny POI-wjednik POI za dwurěčny sydlenski rum Serbow(Daniel Mirtschink, Słona Boršć)
• Nowostart! („Altes Pfarrhaus Groß Döbbern“ z. t., Kopańce/Sprjewja)
• Beletristika za dorosćenych wuknjacych delnjoserbskeje rěče (Šarlota Kušcyc, Choćebuz)
• Interaktiwne bajowe figury w Pančan zakładnej šuli – projekt wot šulerjow za šulerjow (Spěchowanske towarstwo Serbskeje zakładneje šule „Šula Ćišinskeho“ Pančicy-Kukow)
• Serbski Manga: Pokradnjeny pokład (Siggiko – Emily Barthold, Choćebuz)
• Serbske powěsće słyšeć a dožiwić – trojorěčna awdioprodukcija regionalnych bajow (Zwjazk za serbski kulturny turizm z. t., Budyšin)
• Přez adwent z Jurijom – Lutk přinjese rěč, powědki a kuzło do adwentneho časa (Saskia Bugai, Łuchow)
• Zabawny film wo serbskich stawiznach (Kira Hrjehorjec, Lipsk)
• Pokošić w holi – koncepcija za podcast-seriju wo hódnoće mjeńšinowych rěčow (Konstanze Kuschka, Dešno-Strjažow)
• Čara spěwow … na slědach serbskich spěwow ... (Walburga Wałdźic, Lipsk)
• Pisaj, přećelo, pisaj! – bilingualna kniha přećelstwa za zakładnu šulu (Lisa Wimmer, Lubnjow)
• Spěw SJ Chrósćicy (Józef Donat za Holaski, Lipsk)
• Serbske „Tiny desk”-koncerty (Jan Rucha, Zdźěr)
• Piwowy podłožk – našu rěč do hosćencow donjesć (Sylwija Reksowa, Janšojce)
• Serbski Skjarbošc – multimedialna wustajeńca k 800-lětnemu jubilejej wjeskiSkjarbošc (Sophie Rädel za spěchowanske towarstwo za wjesku Skjarbošc)
• Wot realneho do digitalneho. Multimedialne zetkawanišćo – móst mjez zašłosću a přitomnosću. (Bogna Korjeńkowa, Pančicy-Kukow)

Załožba hakle w zwisku z mytowanskim zarjadowanjom dnja 14. Nowembra 2025 w Budyskim Serbskim domje wozjewi, kotrym projektam so kotre mytowanske pjenjezy přizwola.

Narěčenska partnerka za wubědźowanje je:

Anka Němcec, +49 (0)3591 550 319, a.nemcec@zalozba.de