Choćebuski Filmowy festiwal je so rozsudźił, łužiskim a serbskim filmam nowy wuznam dać a Łužisku filmowu přehladku | Łužysku filmowu pśeglědku | Lausitzer Filmschau, kotraž je tradicionelnje festiwal wotewrěła, dale wuwić. Sekcija Heimat | Domownja | Domizna, w kotrejž je załožba hižo wjace hač 10 lět kooperaciska partnerka, je wuwołała Dołhu nóc krótkich łužiskich filmow | Dłujku noc krotkich łužyskich filmow | Die lange Nacht der kurzen Lausitzer.

Mytowanje zarjadowa so lětsa prěni króć do wobłuka spožčenja festiwalneho myta, kotrež je so sobotu wječor wotměło. Tam přepoda zastupjerka direktora załožby Sabina Siegowa dobyćerce Frauke Rahr myto we wysokosći 1.500 eurow. Jeje film "Hoblekaŕnje - Ankleidezimmer", natočeny na wjacorych městnach we Łužicy, wobhladuje intimne sceny za kulisami, hdyž přihotuja serbski zymski nałožk "bože dźěćetko" w Slepjanskej kónčinje. Njewotwisna jury je tón film wuznamjeniła, kotryž nawjazuje na temy serbskeho ludu a kotryž serbsku rěč zapřijima.

Mira Dubianojc a Luka Golinski stej Serbske dorostowe myto załožby za film "pytać a namakać" dóstałoj, ideja za njón mytowaše so hižo loni ze spěchowanskim filmowym mytom Akcija! Delnjoserbskeje rěčneje šule Choćebuz.
Film swjećeše štwórtk wječor na Dołhej nocy krótkich łužiskich filmow premjeru. Rozsud za mytowanje je Sophie Bock, čłonka jury a dźiwadźelnica w Statnym dźiwadle Choćebuz, takle wopodstatniła: "Stawizna přeswědča ze swojej bliskosću k tradicionelnemu delnjoserbskemu wšědnemu dnjej na wsy, mjeztym zo so runočasnje na "queerne" utopije zwaži."

Wyše toho spožčištej załožba a Filmowy festiwal čestne myto Hellmuthej Hennebergej za jeho lěta dołhe skutkowanje jako nawoda redakcije w rbb a wosebje za jeho angažement za serbski film. Na předstajenju filma "Serbska Utopija", projekt serbsko-němskeje filmoweje syće ŁužycaFilm, staj jemu Sabina Siegowa a Andreas Stein, nawoda wobchada FFC, myto přepodałoj. Přitomni zaspěwachu jemu na to sławu.