Tuchwilna wólbna doba Załožboweje rady skónči so spočatk přichodneho lěta. Tohodla namołwja Zwjazkowe předsydstwo Domowiny w zdźěleńce předewšěm serbske zjednoćenstwa, namjety za kandidatow za wuzwolenje serbskich zastupjerjow ze Sakskeje do Załožboweje rady hač do 31.10.2026 zapodać. Tež jednotliwcy smědźa so požadać.

Nadawki Załožboweje rady

Załožbowa rada rozsudźa we wšitkich naležnosćach załožby, wosebje wo:

• zwěsćenju hospodarskeho plana, financneho planowanja a kónclětneho wotličenja,
• powołanju a wotwołanju direktora kaž tež wo jeho wotćeženju,
• wustawkach załožby kaž tež wo wudaću spěchowanskich směrnicow,
• spěchowanju wjetšich projektow.

Rozsudy Załožboweje rady so wot Załožboweje komisije přihotuja a w nalětnim resp. nazymskim posedźenju wobzamknu.

Załožbowej radźe přisłušeja cyłkownje 15 čłonow. Po protokolowej noticy zjednočenskeho zrěčenja a wustawkach załožby pomjenuja a wotpósćelu so wot cyłkownje šesćoch zastupjerjow serbskeho ludu dwejo wot Rady za naležnosće Serbow kraja Braniborskeje a štyrjo wot Zwjazkoweho předsydstwa Domowiny. Kóždy čłon ma měć naměstnicu/naměstnika.

Dalše informacije wo Załožbowej radźe nańdźeće na našej webstronje pod "załožba/struktura".

Zapodaće kandidata

Namjety z wotpowědnym wopodstatnjenjom a z wupjelnjenym naprašnikom kandidatki abo kandidata zapodajće prošu hač do 31.10.2026 w zarjedźe Domowiny. Dalše informacije kaž tež naprašnik nadeńdźeće na webstronje Domowiny.