Jan Budar wostanje na dalše sydom lět direktor Załožby za serbski lud. Wotpowědne słužbne zrěčenje bu dźensa wot předsydy Załožboweje rady, Marka Kowarja, w přitomnosći zamołwiteje za naležnosće Serbow Sakskeho statneho ministerstwa za wědomosć, kulturu a turizm, dr. Madleny Malinkec, w Serbskim domje w Budyšinje podpisane.

„Hódnoću podlěšenje zrěčenja jako připóznaće swojeho dotalneho dźěła, wosebje pak jako nadawk, z personelnym a strukturelnym nowowusměrjenjom załožboweho zarjada pokročować, zo bychmy šěroku paletu nowych nadawkow zmištrowali, spěchowanje zaměrnišo na priority a potrjeby wusměrili a nic naposledk atraktiwny serbski dźěłodawar wostali.“ rozłožuje Jan Budar po podpisanju zrěčenja.

Statna ministerka Barbara Klepsch wuzběhny: „Załožba za serbski lud je za Swobodny stat Sakska wažny partner při spjelnjenju zawjazka k zdźerženju a spěchowanju serbskeje rěče a kultury, kiž ze Sakskeje wustawy a Sakskeho serbskeho zakonja wuchadźa. Jan Budar je w zašłych sydom lětach dźěło Załožby za serbski lud z wulkim angažementom a jasnej wiziju wjedł. Wažny nadawk přichoda, kotremuž je so Załožba za serbski lud pod Janom Budarjom stajiła, je skrućenje serbskeje rěče a kultury w strukturnej změnje. Zo so krajne předewzaće „Serbski forum wědy na Lawskim arealu“ zwoprawdźi, mamy so wosebje wosobinskemu zasadźenju Jana Budarja dźakować. Wjeselu so na dalše zhromadne dźěło z nim a přeju jemu za nowu dobu zastojnstwa wjele mocow a wuspěcha.“

Społnomócnjeny za naležnosće Serbow w Braniborskej, statny sekretar wědomosće a kultury Tobias Dünow: „Na naročnych nadawkach nima najwažniša serbska institucija žadyn njedostatk: Hač dźe wo dalše spěchowanje rěče a kultury, zdobywanje serbskorěčnych wučerjow, digitalizaciju abo strukturnu změnu we Łužicy – bjez Załožby za serbski lud a wot njeje spěchowanych institucijow a projektow njemóže so kulturna identita Serbowkow a Serbow zachować. Přeju Janej Budarjej jako direktor załožby dale zbožownu ruku a wjele wuspěcha.”

„Wjeselu so na zhromadne dźěło z Janom Budarjom. Je wšak to wužadanje a tola wulka zamołwitosć w prócy wo wobstaće a wuwiće serbskeje rěče a kultury, kiž směm nětko z hinašeho městna sem jako předsyda radźićelow přewodźeć.“ praji bywši jednaćel Domowiny, Marko Kowar z posměwkom.  

Załožba za serbski lud załoži so 1991 jako dźěl Sakskeje statneje kenclije. W lěće 1998 sta so wona přez statne zrěčenje ze samostatnej załožbu zjawneho prawa. Zwjazk, Swobodny stat Sakska a Kraj Braniborska  ju spěchuja.

Direktor załožby so po wustawkach na maksimalnje sydom lět powoła. Tuchwilne słužbne zrěčenje z knjezom Budarjom wuběži 30.09.2023. Załožbowa rada jako najwyši rozsudźacy gremij załožby je so dnja 26.01.2023 za to wuprajiła, zrěčenske jednanja zahajić a je dnja 23.05.2023 knjeza Budarja jako direktora hač do 30.09.2030 powołała.

Jan Budar wukonja swoje zastojnstwo wot 01.10.2016. Z toho časa je so załožbje mnoho nowych nadawkow přirjadowało. K tomu liči wusměrjenje na spěchowanske priority kaž zdźerženje rěče, digitalizowanje a marketing kaž tež zawjedźenje zaměrowych dojednanjow ze spěchowanymi institucijemi a projektowymi nošerjemi. Wot 2022 přesadźi załožba na zakładźe inwesticiskeho zakonja wuhlowe regiony spěchowanski program  „Serbska rěč a kultura w strukturnej změnje“. W lěće 2022 zakónči załožba saněrowanje twarskeho kompleksa Serbskeho ludoweho ansambla w Budyšinje. W samsnym lěće je wona projektne nošerstwo a rolu twarskeho knjeza za twarski projekt  „Serbski forum wědy na Lawskim arealu“ w Budyšinje přewzała.