Za wubědźowanje idejow “Rěč zwjazuje. Rěc zwězujo. Sorbisch verbindet.” Załožby za serbski lud je so cyłkownje 48 projektowych idejow z Hornjeje a Delneje Łužicy, kaž tež dwě zwonka sydlenskeho ruma respektiwnje wukraja zapodało.

To su wosebje wšelakore projekty z dźěćimi a dorosćenymi, w kotrychž so akterojo na přikład z narodnej drastu, serbskimi stawiznami a bajemi zaběraja. Dóšli su pak tež projektowe ideje na polu tworjaceho wuměłstwa, dźiwadła a hudźby, kaž tež na polu digitalnych a analognych medijow. Tež wuwiće serbskich hrow je so namjetowało, runje tak kaž ideje, kak móže so widźomnosć serbskeje rěče w zjawnosći powyšić. Dale su so namjety za wuwiwanje wšelakich koncepcijow zapodali, štož bě w lětušim wubědźowanju tež móžne.

Załožba pruwuje nětko zapodaća a přihotuje podłožki za njewotwisnu mytowansku jury. Tuta wšitke ideje po wěstych kriterijach, kaž kreatiwita, inowacija, synergije, naslědnosć a dalše, pohódnoći. Jury schadźuje so potom srjedź septembra a wo mytowanju projektow wuradźuje. Cyłkownje mytuja so 17 idejow: šěsć króć z 1.000 eurami, štyri króć z 3.500 eurami, štyri króć z 5.000 eurami a tři króć z 10.000 eurami. Mytowanje budźe w nazymje, konkretny termin hišće njeje jasny.