16. meje 2025 je so doba za zapodaće idejow za lětuše wubědźowanje "Rěč zwjazuje. Rěc zwězujo. Sorbisch verbindet" skónčiła. 50 idejow za projekty je dóšło.

Wobdźělili su so towarstwa, komuny, předewzaćeljo a priwatne wosoby z cyłeje Łužicy.

Wšitke jara rozdźělne ideje maja zhromadny zaměr, mjenujcy skrućić prezencu serbskeje rěče a kultury w zjawnosći, a to w fyziskich kaž tež we wirtuelnych rumach.

Zapodate projekty poćahuja so na předewzaća w pěstowarnjach a šulach abo na dźiwadłowe, hudźbne, filmowe a druhe wuměłstwowe prezentacije, zdźěla inkl. prezency w socialnych medijach. Dalše planowane naprawy podpěruja serbsce wuknjacych, sposrědkowanje wědy wo serbskich stawiznach, kulturje a wuměłstwje, mjez druhim w zwisku ze serbskim kulturnym turizmom, a wjele wjace. Mjez idejemi je tohorunja wuwiće wosebiteje software.

Jury wubědźowanja je so na swojim druhim posedźenju dnja 2. junija prěni raz z idejemi zaběrała.

Jury:
"Je zajimawe ale tež wužadace, telko kreatiwnych idejow po móžnosći objektiwnje pohódnoćić."

Zapodarjo móža po wšěm zdaću w awgusće z wotmołwu nastupajo swoju projektnu ideju ličić.

Ale hakle na za nazymu planowanym mytowanskim zarjadowanju so wozjewi, kotrym projektam so kotre mytowanske pjenjezy přizwola a kak jury spěchowane ideje wotpowědnje hódnoći.

Pokiw wšitkim, kotřiž so za wubědźowanje idejow zajimuja a rozwažuja, so na dalšim wupisanju wobdźělić: přichodne wubědźowanje planujemy za 2027.

Hdyž to Wam předołho traje, informujće so prošu wo móžnosćach projektoweho spěchowanja - hlej prošu: zalozba.de/hornjoserbsce/spechowanje/stajenje-prostwy

Wjeselimy so na kóždy dobry projekt!

kontakt za naprašowanja: Anka Němcec, a.nemcec@zalozba.de, telefon 03591 550 319