Spěchujo se 10-mjasecny prezencny studium (wót oktobra až do julija).
Institut za sorabistiku Lipšćańskeje uniwersity zestaja plan wucbnych zarědowanjow, pó kótaremž maju se stipendiaty/stipendiatki wobźěliś na wucbnych zarědowanjach.

Stipendium se płaśi 10 mjasecow.
Pódlejšenje rowno tak ako pśetergnjenje a pózdźejše dalejwjeźenje studiuma njejsu pśi tom móžne.

Stipendium wopśimujo:

• mjasecnu pódpěru we wusokosći 800 EUR,
• knigłowe pjenjeze wót 100 EUR.

Mimo togo pśiwzejo Załožba za serbski lud trjebne wudawki za wobźělenje stipendiatow/stipendiatkow na tśi- do styridnjowskem kubłańskem jězdźe do sedleńskego ruma Serbow, kótaryž se wótmějo pšawidłownje w měrcu.
We wobtwarźonych padach, na pś. gaž jaden stipendiat abo jadna stipendiatka njamóžo se na kubłańskem jězdźe wobźěliś, móžo Załožba za serbski lud alternatiwnje na zakłaźe pšosby pśipłaśonk za indiwiduelny jězd do sedleńskego ruma Serbow pśizwóliś. Pśi tom dej jězd w direktnem zwisku k tematice skóńcnego źěła stojaś. Pšosbje matej se dodaś rozymliwe pówoblicenje wudankow a wobkšuśenje wucecego z Instituta za sorabistiku Lipsk, kótaryž stipendiata/stipendiatku pśi naźěłanju źěła wobradujo.

Stipendium njewopśimujo semesterskej pśinoska a pśinoski za chórobne a rukowańske zawěsćenje ako teke zawěsćenje pśez znjeglucenje.
Informacije wó aktualnych semesterskich pśinoskach glej pšosym pód:
www.uni-leipzig.de/studium/im-studium/rueckmeldung-und-semesterbeitrag
Informacije glědajucy na trjebne zawěsćenja, wusokosć wudankow za bydlenje w Lipsku a dalšne wuměnjenja za studium w Lipsku namakajośo we wótrězku „Pokazki glědajucy na studijne dowólenje za Lipšćańsku uniwersitu a druge wuměnjenja“.

Stipendium se płaśi njewótwisnje wót płaśenjow tśeśich, na pś. dalšnych stipendiumow abo źěłowych mytow. Zwónoźenje pódlańskego źěła w casu stipendiuma pak jo jano z pśigłosowanim Załožby za serbski lud, kótarež dajo se dopokazaś, dowólone. Głowny kriterium za pśigłosowanje jo, až pódlańske źěło zaměr stipendiuma njewobgrozujo a se jomu njeznapśeśiwijo.

Procowanja wó stipendium mógu se kužde lěto až do 01.03. zapódaś.
Pšosby płaśe za zachopjeńk studiuma w zymskem semestrje wót oktobra běžnego lěta.
Stipendium, kótaryž jo se za wěsty studijny zachopjeńk pśizwólił, njamóžo se zasadnje na pózdźejšy studijny zachopjeńk pśenjasć.

Zajmce muse:

• na pśipóznatej wusokošuli dalejwjeźecy studium (bachelor, master, statny eksamen/statne pśespytowanje abo pśirownujobne wótzamknjenje) w pśedmjaśe slawistika abo pódobnem směrje absolwěrowaś abo dokóńcowany měś - wótzamknjenja njesměju starše ako 2 lěśe byś -; laže wótzamknjenja dlej w zachadnosći, su procowanja jano we wobtwarźonych padach dowólone, na pś. pśi samodrugosći a póroźe, wótwardowanju źiśi až do maksimalnje 3 lěta dłujko a pśi pśirownujobnych padach (pšosbje maju se dopokaze dodaś),
• nanejmjenjej 2. studijne lěto dalejwjeźecego studiuma wuspěšnje zakóńcone měś,
• nic starše ako 32 lět byś,
• dosegajuce rěcne znaśa měś, aby njeměli wót zachopjeńka śěžkosći, serbskim wucbnym zarědowanjam slědowaś,
  
  Ako dosegajuce se pśipóznawaju rěcne znaśa serbskeje rěcy nanajmjenjej niwowowego schójźeńka B1 pó Zgromadnem europejskem referencnem ramiku (GER) resp. rěcne znaśa drugeje słowjańskeje rěcy niwowowego schójźeńka C2.
  
  • Procowarje/Procowaŕki, kenž póchadaju ze słowjańskich statow resp. regionow a pśedpołožyju wótpowědujuce maminorěcne šulske resp. studijne wótzamknjenja, njetrjebaju swóje słowjańske rěcne znaśa pśidatnje z certifikatom dopokazaś.
  • Procowarje/Procowaŕki, kenž njepóchadaju ze słowjańskich statow resp. regionow, muse swóje słowjańske rěcne znaśa dopokazaś - dopokaz z rěcnym wopismom abo rěcnym certifikatom.
  • Procowarje/Procowaŕki, kenž maju słowjańske rěcne znaśa niše ako niwowowy schójźeńk C2 pó Zgromadnem europejskem referencnem ramiku, muse toś te a pśidatnje rěcne znaśa serbskeje rěcy niwowowego schójźeńka B1 dopokazaś - dopokaz z rěcnym wopismom abo rěcnym certifikatom, dopokaz znaśow serbskeje rěcy alternatiwnje z pósudkom pśipóznatych wucabnikow rěcy. 

    
    Pokazki:

    Procowarje/Procowaŕki, kenž se za górnoserbsku rěc zajmuju, informěrujomy wó mjazynarodnem lěśojskem kursu serbskeje rěcy a kultury Serbskego instituta, kótaryž wótměwa se kužde druge lěto. Dokładnjejše informacije glej pšosym:
    www.serbski-institut.de/os/serbski-institut/poskitki/letni-kurs
    

    Procowarje/procowaŕki, kenž se za dolnoserbsku rěc zajmuju, mógu se glědajucy na rěcne kurse pla Šule za dolnoserbsku rěc a kulturu informěrowaś:
    www.sorbische-wendische-sprachschule.de

    
    

    Mimo togo stoje rěcne kurse online k dispoziciji:

    sprachkurs.sorbischlernen.de

    
    

    sorbischlernen.de

    
    

    Wó móžnosćach, rěcny certifikat za serbšćinu dostaś, mógu se zajmce pla Rěcnego centruma WITAJ informěrowaś:
    

    www.sprachzertifikat-sorbisch.de
  
  
• z tym wobjadne byś, až Załožba za serbski lud we wobłuku swójeje kompetence na wósobu se póśěgujuce daty a skóńcne źěła, kenž su w konteksće stipendiuma nastali, składujo a pśeźěłujo, a to nic jano za aktualny stipendium a z tym zwisujuce zarědowanja, ale teke za zarědowanja a aktiwity, kótarež na stipendium nawězuju.

Zajmce za stipendium maju na kuždy pad teke wuměnjenja za studium na Lipšćańskej uniwersiśe dopołniś.

Pšosym informěrujśo se pśed zapódaśim procowanja wó stipendium wó wuměnjenjach za studijne dowólenje direktnje na webboce uniwersity.

Za studijne dowólenje se pominaju slědujuce dokumenty:

• wopismo powšykneje abo na fach wězaneje wusokošulskeje zdrjałosći, inkl. pśeglěda pśedmjatow a censurow - w originalnej rěcy a ako amtski wobkšuśony nimski abo engelski pśełožk
• gaž sćo južo studěrowali: dopokaz wšych južo dojśpjonych studijnych wugbaśow a studijnych wótzamknjenjow, inkl. transcript of records - w originalnej rěcy a ako amtski wobkšuśony nimski abo engelski pśełožk
• jolic až pśitrjefijo: pśiwześowe pśespytowanje wusokošule - w originalnej rěcy a ako amtski wobkšuśony nimski abo engelski pśełožk.

Pokazki glědajucy na chórobne a rukowańske zawěsćenje ako teke zawěsćenje pśez znjeglucenje

• chórobne zawěsćenje za Nimsku
  Studěrujuce su kazniski zawězane, dosegajuce chórobne zawěsćenje dopokazaś, kenž płaśi za cełe studijne pśebywanje w Nimskej.
  Bźez takego chórobnego zawěsćenja njamógu se studěrujuce imatrikulěrowaś.
  Kazniske chórobne zawěsćaŕnje maju studěrujucych pśiwześ, gaž su młodše ako 30 lět. Studěrujuce wót 30 lět maju priwatne chórobne zawěsćenje wótzamknuś.
  Pšosym informěrujśo se w pśirucce "Ratgeber Krankenversicherung" Lipšćańskeje uniwersity:
  www.uni-leipzig.de ... Ratgeber_Krankenversicherung_de.pdf
• zawěsćenje pśez znjeglucenje jo na uniwersiśe zarucone
  Studěrujuce su za cas wu- a dalejkubłanja pśez kazniske zawěsćenje pśez znjeglucenje šćitane. Zawěsćenje pśez znjeglucenje na Lipšćańskej uniwersiśe jo pśez Saksku kasu za zawěsćenja pśez znjeglucenje zarucone. Zawěsćone su cynitosći, kenž laže pó wopśimjeśu a organizatoriski w zagronitosći uniwersity.
• rukowańske zawěsćenje se dopórucyjo
  Wótzamknjenje rukowańskego zawěsćenja njejo pśedpisane. Weto se pórucyjo pśespytowaś, lěc zawěsćenje w domacnem kraju teke płaśi za Nimsku.

Pokazki glědajucy na dowólnosć za pśebywanje a wizum

• Staśany/Staśanki EU njetrjebaju za studijne pśebywanje w Lipsku daniž dowólnosć za pśebywanje daniž wizum. Pšawniski rownostajone su staśany/staśanki EWR-statow Islandska, Liechtenstein a Norwegska.
• Wše, kenž njejsu staśany/staśanki EU/EWR a kśě dlej ako 90 dnjow w Nimskej studěrowaś a bydliś, deje na zarěd za wukrajnikow pšosbu wó dowólnosć za pśebywanje ze zaměrom studěrowanje zapódaś.
  Staśany/Staśanki statow, kenž njejsu EU/EWR, mógu se pśez Ministaŕstwo wenkownego informěrowaś, až słušaju k tym staśanam/staśankam, kenž směju bźez wizuma do Nimskeje zadrogowaś a mógu pšosbu wó dowólnosć za pśebywanje direktnje zapódaś, pótakem bźez togo, až su do togo zapódali pšosbu wó studentski wizum na Nimske wjelikopósłaństwo.
• Wše staśany/staśanki, kenž njelice k tym, kenž směju bźez wizuma do Nimskeje zadrogowaś, trjebaju za studijne pśebywanje nimski studentski wizum a dowólnosć za pśebywanje. Pšosba wó studentski wizum ma se pśed zadrogowanim do Nimskeje we wótpowědnem domacnem kraju na Nimske wjelikopósłaństwo zapódaś a wizum wót tam sebje wustajiś daś. Pšosba wó dowólnosć za pśebywanje ma se pó pśikłaźe w Nimskej zapódaś.

Pšosym informěrujśo se wó tom z pomocu infołopjena Lipšćańskeje uniwersity:
www.uni-leipzig.de ... Aufenthaltserlaubnis_Studierende.pdf
Pśeglěd wó tom, chto trjeba wizum za zadrogowanje do Nimskeje a chto nic, namakajośo pód:
www.auswaertiges-amt.de/de/service/visa-und-aufenthalt/staatenliste-zur-visumpflicht

Pokazki glědajucy na winowatosć, se na pśizjawjeńskem amśe registrěrowaś daś
Dokulaž płaśi w Nimskej winowatosć, se na pśizjawjeńskem amśe registrěrowaś daś, a dokulaž wóstanjośo ako stipendiat/stipendiatka dlej ako 90 dnjow w Nimskej, musyśo sebje pó swójom pśijězdźe w Nimskej na pśizjawjeńskem amśe w Lipsku registrěrowaś daś. Za to musyśo:

• wěrjobnje rysowaś, až móžośo swój studium sami financěrowaś,
• dopokazaś, až sćo chórobnje zawěsćone,
• wobkšuśenje wótnajmarja swójogo studentskego bydlenja pśedpołožyś.

Pokazka glědajucy na bydlenje w Lipsku
Mjasecny najm za studentske bydlenje abo za śpu w Lipsku wucynijo pó informaciji Lipšćańskeje uniwersity aktualnje jadnab 250 do 425 EUR.
Cośo-lic w internaśe Studentskeje pomocy Lipsk bydliś, móžośo se tam wó městno procowaś.
Cośo-lic zgromadnje ze serbskimi studěrujucymi bydliś, maśo se za městno w internaśe na droze Arno Nitzsche procowaś. Tam bydli wjele serbskich studěrujucych.
Wó městno w internaśe móžośo se pak akle pótom procowaś, gaž sćo wót Lipšćańskeje uniwersity studijne dowólenje dostali.
Pósrědnijomy how link za procowanje wó městno w internaśe studentskeje pomocy:
www.studentenwerk-leipzig.de/wohnen/wohnheim-bewerbung.

Procowanja maju se zapódaś w póstajonem casu. Wužywaś smějo se jano online-formular Załožby za serbski lud.
Z mejlku abo postom pśipósłane procowanja ako teke procowanja, kenž njejsu dopołne, njebudu se wobglědowaś.
Ako zawcasa zapódane płaśe procowanja, gaž pśedlaže až do zeger 24 (MEZ resp. MESZ) slědnego za zapódaśe procowanjow dowólonego dnja.
Njesćelśo swójo procowanje pó móžnosći akle na slědnem dowólonem dnju, aby Wy mógali felujuce pódłožki hyšći zacasa dodaś a až se dochad zawěsćijo njeglědajucy na ewentualnje techniske problemy.

Slědujuce pódłožki maju se zapódaś:

• dopołnjony formular online-procowanja – pšosym pó móžnosći górnoserbski, dolnoserbski abo nimski dopołniś

W formularje online-procowanja maju se ako pdf-dokumenty zlodowaś:

• tabelariski žywjenjoběg z fotom - pšosym pó móžnosći w górnoserbskej, dolnoserbskej abo nimskej rěcy (foto móžo se teke ako separatna fotowa dataja zlodowaś)
• wopismo powšykneje abo na fach wězaneje wusokošulskeje zdrjałosći, inkl. pśeglěda pśedmjatow a censurow - w originalnej rěcy a ako amtski wobkšuśony nimski abo engelski pśełožk
• dopokaz wó studiumje w pśedmjaśe slawistika abo pódobnem směrje, k comuž słušaju:
  
  • wobkšuśenje studijnego wótběga domacneje uniwersity - pšosym w engelskej rěcy
  • oficialna lisćina wšych južo dojśpjonych studijnych wugbaśow a studijnych wótzamknjenjow, inkl. dojśpjonych credit points (CP) a pśerěznych censurow (transcript of records) - pšosym w engelskej rěcy abo w originalnej rěcy ako amtski wobtwarźony nimski pśełožk
  • gaž pśitrjefijo: pśiwześowe pśespytowanje wusokošule - w originalnej rěcy a ako amtski wobkšuśony nimski abo engelski pśełožk
  gaž sćo studium dokóńcowali, mimo togo:
  • wopismo akademiskego titela a diploma supplement - pšosym w nimskej rěcy

• dopokaz rěcnych znaśow
  
  • Dopokazaś maju se rěcne znaśa serbskeje rěcy nanajmjenjej niwowowego schójźeńka B1 pó Zgromadnem europejskem referencnem ramiku (GER) resp. rěcne znaśa drugeje słowjańskeje rěcy niwowowego schójźeńka C2.
  • Procowarje/Procowaŕki, kenž póchadaju ze słowjańskich statow resp. regionow a pśedpołožyju wótpowědujuce maminorěcne šulske resp. studijne wótzamknjenja, njetrjebaju swóje słowjańske rěcne znaśa pśidatnje z certifikatom dopokazaś.
  • Procowarje/Procowaŕki, kenž njepóchadaju ze słowjańskich statow resp. regionow, muse swóje słowjańske rěcne znaśa dopokazaś - dopokaz z rěcnym wopismom abo rěcnym certifikatom.
  • Procowarje/Procowaŕki, kenž maju słowjańske rěcne znaśa niše ako niwowowy schójźeńk C2 pó Zgromadnem europejskem referencnem ramiku, muse toś te a pśidatnje rěcne znaśa serbskeje rěcy niwowowego schójźeńka B1 dopokazaś - dopokaz z rěcnym wopismom abo rěcnym certifikatom, dopokaz znaśow serbšćiny alternatiwnje z pósudkom pśipóznatych wucabnikow rěcy.

• pismo k motiwaciji (pisane z kompjuterom), kótarež krotko a pregnantnje na maks. styrich bokach A4 rysujo a rozkładujo, cogodla kandidat/-ka wuměnjenja za procowanje dopołnijo, za kótare temy se wósebnje zajmujo, lěc a w kótarej měrje jo źělny studium wažny abo pomagaś móžo, swójske akademiske, pówołańske a wósobinske zaměry dojśpiś - pšosym pó móžnosći w górnoserbskej, dolnoserbskej abo nimskej rěcy

• nanejmjenjej jadno dopóruceńske pismo wucecego domacneje uniwersity studijnego pśedmjata slawistika pódobnego směra - pšosym pó móžnosći w górnoserbskej, dolnoserbskej, nimskej abo engelskej rěcy.
  Dopórucenja maju se paralelnje k online-pósrědnjenju w originalu z postom pósłaś na slědujucu adresu (postowy kołk wót 01.03. se akceptěrujo ako zapódaśe w póstajonem casu):
  
  Załožba za serbski lud / Stiftung für das sorbische Volk
  - Procowanje wó stipendium -
  Postplatz 2 / Póstowe naměsto 2
  02625 Bautzen/Budyšin
  GERMANY

Załožba za serbski lud pśespytujo zapódane pódłožki na pšawosć a dospołnosć.
Pósuźowanje procowanjow a rozsud wó pśizwólenju stipendiumow pśiwzejo wót Załožby za serbski lud zwołana a pó fachowych aspektach zestajona komisija. W komisiji statkuju wucece Instituta za sorabistiku Lipsk, zwenka uniwersity statkujuce wědomnostniki/wědomnostnice ako teke zastupniki/zastupnice Załožby za serbski lud. Pó pótrjebje wobstaraju se pśidatne gódnośenja a pósudki. Ewentualnje se teke něgajšne stipendiaty/stipendiatki wobźěliju.
Wuzwóleńske kriteriumy:

• dopołnjenje wuměnjenjow za stipendium
• motiwacija, wuwijański potencial
• doněntejšne studijne wugbaśa
• dopóruceńske pisma
• zwenkafachowe znaśa, zajmy a priwatny angažement, kótarež zaměr stipendiuma pódpěraju.

Pśizwólenje stipendiuma jo wuzamknjone, gaž jo procowaŕ/-ka stipendium Załožby za serbski lud južo raz dostał/-a.

Procowarje/Procowaŕki se informěruju, lěc se jim stipendium pśizwólijo abo nic.

Pšosym stajśo se ned, za tym ako sćo dostali pśigronjenje stipendiuma, z Institutom za sorabistiku Lipsk do zwiska.
Waš tamnjejšy pśigranjański partnaŕ jo Matthias Schlegel/Mato Šlegel (matthias.schlegel@uni-leipzig.de, tel. +49 341 937650, faks +49 341 97 37659). Wón pódpěra Was pśi pśigótowanju na źělny studium a w casu studiuma.

Ako prědne maśo pšosbu wó studijne dowólenje na Lipšćańsku uniwersitu zapódaś. Glej k tomu pšosym wótrězk "Pokazki glědajucy na studijne dowólenje za Lipšćańsku uniwersitu a druge wuměnjenja".
Źěl za to trjebnych dokumentow sćo w kopiji (ako scan) južo za procowanje wó stipendium trjebali.
Mimo togo dejśo na kuždy pad za Nimsku płaśece chórobne zawěsćenje a (jolic až pśitrjefijo) wizum a/abo wobkšuśenje dowólnosći za pśebywanje w Nimskej pśedpołožyś.

Za tym ako sćo studijne dowólenje dostali, maśo se na Lipšćańskej uniwersiśe zapisaś, aby Wy mógali teke studěrowaś (zapisanju groni se teke imatrikulacija). Zapisaś musy se až k terminoju, kenž jo w powěźeńce wó studijnem dowólenjeju pódany.

Powěźeńka wó studijnem dowólenju jo teke wuměnjenje za procowanje wó městno w internaśe.
Za zymski semester se zachopijo rozdźělenje městnow w internatach zwětšego w awgusće. Zapódajśo Wašo procowanje (maśo pšosym zasadnje sami pšosbu stajiś) pšosym na kuždy pad až do zachopjeńka julija. Glědajucy na procowanje wó městno w internaśe glej pšosym wótrězk "Pokazka glědajucy na bydlenje w Lipsku".

Pšosym wobkšuśćo Załožbje za serbski lud zawcasa do nastupa studija (nejpózdźej až do 15.09.) pśiwześe stipendiuma a dopokažćo w tom zwisku imatrikulaciju na Lipšćańskej uniwersiśe a Wašu adresu za studijne pśebywanje ako teke Wašogo wótnajmarja.
Z pśiwześim stipendiuma se zwěžośo te ze stipendiumom zwězane wuměnjenja dopołniś. Jano na tom zakłaźe wótzamknjo Załožba za serbski lud z Wami stipendijowe dojadnanje (priwatnopšawniske dogrono). Pódpisanje stipendijowego dojadnanja se stanjo w zwisku z nastupom studiuma w Lipsku.

Něźi w samskem casu maśo se na pśizjawjeńskem amśe w Lipsku registrěrowaś daś a girokonto w Nimskej wótwóriś, na kótarež se stipendium płaśi. Wótpowědny IBAN dajśo pšosym k wěsći Załožbje za serbski lud.

Pokazka:
Mysliśo pšosym na to, se do slědkjězda do domownje na pśizjawjeńskem amśe w Lipsku wótzjawiś.

Stipendium a knigłowe pjenjeze se pśepokažu jano na girokonto w Nimskej.
Pśepokazanja do wukraja njejsu móžne.
Płaśenja su pśedwiźone ako slědujo:

• pśi nastupje studiuma w oktobrje 1.000 EUR w gótowych pjenjezach,
• wót nowembra 8 x mjasecnje pśecej k 5. mjaseca 800 EUR z pśepokazanim,
• w juliju k 5. mjaseca 600 EUR z pśepokazanim.

Knigłowe pjenjeze se pśizwóliju zasadnje jano za sorabistisku fachowu literaturu w serbskej rěcy, kótaruž dostanjośo pśedewšym w Smolerojc knigłaŕni Ludowego nakładnistwa Domowina w Budyšynje, a se rozměju ako pśipłaśonk. Knigłowe pjenjeze se wupłaśiju na zakłaźe pśedlažecych zliceńkow z konkretnym pomjenjenim kupjonych knigłow, inkl. dopokaza płaśenja.

Procowańske pódłožki wóstanu pla Załožby za serbski lud a pśejdu do jeje swójstwa.
Na wósobu se póśěgujuce daty procowarjow/procowaŕkow składujo a pśeźěłajo Załožba za serbski lud we wobłuku swójeje kompetence wótpowědujucy kazni Zwězka wó datowem šćiśe a zakładnem póstajenju EU za datowy šćit. Załožba za serbski lud njewužywa daty jano za aktualny stipendium a z tym zwisujuce zarědowanja, ale teke za dalšne zarědowanja a aktiwity, kótarež na stipendium nawězuju.

Dalšne informacije k datowemu šćitoju glej pšosym:
stiftung.sorben.com/deutsch/datenschutz.