Zjawny list nastupajo studij sorabistiki na Lipšćanskej uniwersiće
Öffentlicher Brief das Studium der Sorabistik an der Universität Leipzig betreffend

wurězk

Cesćony statny ministaŕ Gemkow,

zachowanje a spěchowanje serbšćiny a serbskeje kultury trjeba nacasny serbskorěcny studium, kenž se z wšyknymi wobłukami sorabistiki zaběra. K tomu słušaju mimo rěcywědy teke stawizny, literaturowěda, ludowěda a dalšne wobłuki kulturnych wědomnosćow. To jo šym wažnjejšy, dokulaž wukubłajo se jano na Lipšćańskej uniwersiśe wucabnikojski dorost za serbšćinu wšyknych šulskich družynow, kótaryž we Łužycy nuznje trjebamy. To płaśi teke za pśiducny personal serbskich institucijow.

Dokulaž stej serbšćinje słowjańskej rěcy a stawizny Serbow su wusko ze słowjańskim swětom zwězane, rozmějo se sorabistika rozmějo ako źěl slawistiki a ma se togodla w toś tom zmysle dalej profilěrowaś. Pśirownanje z drugimi mjeńšynowymi rěcami jo wužytne, njestoj pak we fokusu sorabistiskego slěźenja a wuwucowanja.

Domowina, serbske institucije a nadregionalne towaristwa wócakuju, až se kwalita studija sorabistiki na Instituśe za sorabistiku pówušyjo, z gódnym serbskorěcnym personalom wugótujo a z wótpowědujucymi źěłowymi městnami pódkłaźo. Tuchylu studij sorabistiki serbskim pótrjebam njewótpowědujo.

Slědujuce konkretne napšawy su z našogo wiźenja trjebne:

1. Docenty a sobuźěłaśerje Instituta za sorabistiku dejali serbšćinu na wusokem niwowje wobkněžyś. Swóje rěcne zamóžnosći dopokazuju wóni z wótpowědnym certifikatom na niwowje C1 a perspektiwiski teke C2.
2. Institut za sorabistiku dejał pšawidłownje rěcnu wucbu za wšake niwowy studentow sorabistiki póbitowaś. Toś to póbitowanje ma se teke studentam drugich fachowych směrow wótwóriś.
3. Pó pśikłaźe drugich rěcnych pśedmjatow dejała se didaktika za bilingualnu wucbu ako teke za serbšćinu ako drugu rěc wutwariś. Pśi tom dejało se tejerownosći na studentow drugich fachowych směrow źiwaś.
4. Mimo filologiskego wukubłanja dejało se šyroko rozměte sorabistiske kubłanje zarucyś, kótarež źiwa rownocasnje na kulturnowědomnostne, literarnowědomnostne, stawizniske a dalšne póbitowanja.
5. Zwiski k slawistiskim institutam w tu- a wukraju dejali se skšuśiś. To nastupa wósebnje kooperacije na pólu wuwucenja, ale teke aktiwnu studentsku wuměnu.
6. Pó serbskej kazni zarucyjotej sakski stat a uniwersita w Lipsku wusokošulske wukubłanje na pólu sorabistiki. K pódpěrje dejał Institut za sorabistiku w Lipsku kooperacije z drugimi institucijami natwariś, kenž se zaběraju ze sorabistiku, wósebnje ze Serbskim institutom w Budyšynje a Chóśebuzu ako teke z Institutom za slawistiku na drježdźańskej TU. Dejało se pśespytowaś, lěc mógali se wědomnostniki Serbskego instituta sobu do wuwucenja na Instituśe za sorabistiku zapśimjeś a jo pódpěrowaś.

Z pśijaznym póstrowjenim