Medijowe wózjawjenja (archiw)
Załožbowa rada jo spěchowańske směrnicy wobzamknuła
online,
We wurědnem pósejźenju jo Załožbowa rada pśeźěłane spěchowańske směrnice załožby wobzamknuła.
(górnoserbski, dolnoserbski pśełožk slědujo)
Załožbowa rada je spěchowanskej směrnicy wobzamknyła
We wurjadnym posedźenju, kiž je so dnja 16.09.2026 digitalnje wotměło, wobzamkny Załožbowa rada nowej spěchowanskej směrnicy z wotpowědnymaj spěchowanskimaj konceptomaj: jednu k projektowemu spěchowanju, druhu wo spožčenju stipendijow. Do toho bě trěbne intensiwne dorozumjenje mjez Załožbu za serbski lud, Sakskim statnym ministerstwom za wědomosć, kultura a turizm (SMWK), Sakskim statnym ministerstwom za financy (SMF) a Sakskim zličbowanskim zarjadom (SRH), štož žadaše sej wjacore koła předźěłanja směrnicow a konceptow.
Tuchwilu płaćaca směrnica załožby wobsteji z lěta 2003 a bu z toho časa jenož snadnje změnjena. Wona wobsahuje projektowe spěchowanje runje tak kaž spožčenje stipendijow. W zašłych lětach artikulowachu próstwystajerjo wšelakore potrjeby, kiž so w směrnicy scyła nic abo w njedosahacej měrje wobkedźbuja, tak zo bě wobšěrne předźěłanje a precizowanje na času. W tutym zwisku dósta směrnica nowu strukturu, wobłuk stipendije wuwza so do swójskeje směrnicy.
Wotpowědnje aktualnym zarjadniskim předpisam k Sakskemu hospodarskemu porjadej je nimo spěchowanskeje směrnicy tež specifiski spěchowanski koncept trěbny, kiž wobsahuje zaměry, kiž hodźa so kwalitatiwnje a kwantitatiwnje měrić. Tutej so paralelnje k směrnicomaj nadźěłaštaj a nětko prěnjotnje předležitaj.
Bytostne změny spěchowanskeje směrnicy k projektowemu spěchowanju
- zjimanje honorarnych sadźbow a dalšich spěchujomnych wudawkow w přehladnej matriks wudawkow
- rozkładźenja k próstwje wo płaćenju pawšale za zarjadniske wudawki
- pola próstwystajerjow zwonka sydlenskeho ruma leži fokus na městnosći skutkownosće projekta a nic na městnosći přewjedźenja, štož zmóžni wyšu spěchowansku sadźbu
- zawod zaměrowych dojednanjow
- skrótšene doby za krótkodobne mjeńše projekty
- integracija digitalnych a awdiowizuelnych projektow do wšelakorych spěchowanskich wobłukow
- jasniše postajenja k spěchowanju filmow a widejow
- wotewrjenje přiražkow za nošerstwo pěstowarnjow ze serbskimi skupinami (dotal bě jenož Serbske šulske towarstwo z. t. spěchujomne)
- přiwzaće spěchowanskeho wobłuka digitalizaciske naprawy
- zawod dypkowanja za hódnoćenje próstwow wo spěchowanje
Nadrobne informacije k změnam směrnicy steja w spěchowanskim koncepće, kiž so zhromadnje ze směrnicu po finalnym pruwowanju prawniskeho dohlada na webstronje załožby wozjewi.
Předźěłana spěchowanska směrnica płaći za wšě projekty, kiž so wot 2027 přewjedu.
Spěchowanska směrnica wo spožčenju stipendijow
Załožba za serbski lud ma dwaj programaj za spožčenje stipendijow: 12-měsačny stipendij za dźělny studij sorabistiki za studowacych z wukraja a wukonowy stipendij za studowacych sorabistiki a wučerstwa serbšćiny. Zaměr tutych stipendijow je zdobyće fachoweho a nawodniskeho dorosta, štož ma wukonliwosć serbskeje towaršnosće, kultury a rěče tež w přichodźe zaručić.
Bytostne změny spěchowanskeje směrnicy wo spožčenju stipendijow
- wudźěłanje swójskeje směrnicy
- zběhnjenje wobmjezowanja wukonoweho stipendija na uniwersitu w Lipsku
Spěchowanska směrnica wo spožčenju stipendijow je tež wot 2027 płaćiwa a so zhromadnje z wotpowědnym konceptom po finalnym pruwowanju prawniskeho dohlada na webstronach załožby wozjewi.