Financna situacija Załožby za serbski lud a z tym financěrowanje serbskich institucijow a projektow jo lěto a wěcej napněta. Južo 2024 jo musał zastojnstwo załožby derje licyś a z pjenjezedawarjami jadnaś, aby se nowo wutwórjone źěłowe městna až do kóńca toś togo lěta mógali dalej wjasć. Pśicyny za to su stopnjowanja myta pśistajonych zjawneje słužby. Dokulaž njejo teke lětosa pśipłaśonk za załožbu wušej až doněnta, móžo se góspodaŕski plan 2025 jano wurownaś, gaž se wšykne rezerwy pśetrjebaju. Rezerwow dla pak jo teke zarucone, až móžo Załožba južo pśilubjone projekty njeglědajucy na nachylne góspodarjenje, pśizwóliś. Jan Budar, direktor załožby groni: „Situacija nachylnego góspodarjenja jo powšyknje wupominanje, wopytajomy pak drogi namakaś, až njejsu wažne projekty a źěłabnosć institucijow wobgrozone.“

Mimo napněteje financneje situacije pak glěda Załožba teke na wuspěšne lěto 2024 slědk. Wjele rědnych projektow jo se pśizwóliło a zwopšawdniło. A swěśili smy teke dwa jubileja zmakanjow něgajšnych a tuchylnych studentow, kótarejž Załožba južo wót źewjeśźasetych lět ako zarědowaŕ organizěrujo. Schadowanka w Dolnej Łužycy jo měła 40. a schadowanku w Górnej Łužycy 150. jubileja. „A dalej jo se nam, njeglědajucy na powšykne zjawy felujucych fachowych mócow raźiło, 4 městna w našom zastojnstwje ze serbski powědajucym kwalificěrowanym personalom znowego wobsajźiś.“, jo gronił Jan Budar.

Za toś to lěto jo něnto wjeliki nadawk dalšne planowanje projekta Lawskego areala. 2025 ma se spěchowańska pšosba zapódaś. Dla stupajucych twaŕskich kostow ma Załožba nadawk toś te cełkowne kosty znižyś abo pśidatne srědki nawabiś.

Nejwětše wupominanje za toś to lěto drje budu góspodaŕske jadnanja ze spěchowanymi institucijami za lěto 2026 a zestajenje wótpowědnego góspodaŕskego plana załožby. Wšako njejo jasne, gdy změjomy nowe financěrowańske dogrono. Załožba se toś naźeja, až se wótpowědujuce jadnanja w nazymje wuspěšnje zakóńcyju a až jo pótom jasne, z kak wjele pjenjezymi mógu Serby 2026 licyś.