W lěśe 2025 jo stojał za nas ako Załožba za serbski lud pśedewšym staw jadnanjow k Pětemu financěrowańskemu dogronoju w srjejźišću. Toś te su se južo zachopili w septembrje 2023 a wótměli se pód pśiběrajucy śěžkimi financnymi połoženjami. Mjaztym su jadnanja pśisamem wótzamknjone, tak až ma se dogrono zachopjeńk 2026 pódpisaś. Z tym dostanu naš zastojnstwo załožby, wósym institucionelnje spěchowanych institucijow ako teke wjele projektowych pśedewześow planowańsku wěstotu až do 2030. Mimo togo góźe se stupane personalne kosty zapópadnuś, bźez togo až jo wóttwaŕ źěłowych městnow trjebny. To twóri trjebny strukturny zakład, aby my naš centralny nadawk - serbsku rěc a kulturu teke pśichodnje witalnje a widobnje zdźaržaś - naslědnje społniś mógali.

Teke we wobłuku digitalizacije smy mógali 2025 cuśniwe póstupy dojśpiś, wósebnje na pólu rěcnych technologijow a digitalizacije procesow. Našej wjelikej wiziji serbsko-nimskego digitalnego simultanego pśełožowarja slědujucy, su byli prědne testy w praksy wuspěšne. Z tym jo serbska rěc napśeśiwo wjelikima rěcoma na pólu mašinelnego spóznawanja rěcy a awtomatiskego pśełožowanja tekstow jasnje nachwatała. W lěśe 2026 buźomy dalej na tom źěłaś, až se datowa baza a z tym na kwalitu nałožowanjow pólěpšujo. Dalšny wuznamny projekt jo zawjeźenje centralnego systema za management dokumentow w pěś serbskich institucijach, kótarychž zwopšawdnjenje ma se 2026 zakóńcyś. Zaměr jo, wjele se wóspjetujucych zastojnstwowych procesow digitalizěrowaś a pśez to jadnorjej a eficientnjej wugótowaś.

Spěchowańskej programa "Serbska rěc a kultura w strukturnej změnje", za kótarejž dostawamy wót 2022 strukturne srědki Zwězka, pódajotej se 2026 do swójogo pětego lěta spěchowanja. Z tym jo pśirada za projektowe pšosby w Lichotnem staśe Sakskej swóju prědnu legislaturu wótzamknuła a dej se wót 2026 znowego pomjeniś. Rownocasnje projekty, kótarež su se w lěśe 2022 na cas pěś lět pśizwólili, něnto wobšyrnje ewaluěrujomy. Toś ta ewaluacija ma byś funděrowany zakład za rozsud, lěc se projekty dalej spěchuju.

Tuchylu nejwětšy projekt našeje załožby jo twaŕske pśedewześe "Serbski forum wědy na Lawskem arealu". W lěśe 2025 smy mógali planowanja tak daloko konsoliděrowaś, až se górna granica kostow doźaržyjo a su rownocasnje móžne pówušenja kostow źiwane. Pśizwólenje za prědnu spěchowańsku periodu pśedlažy, twaŕska pšosba za prědny twaŕski wótrězk smy zapódali. Zachopjeńk 2026 ma planowańska pśedłoga dokóńcona a fachowje wobkšuśona byś ako teke twaŕska dowólnosć pśedlažaś, tak až góźi se w lěśu z prědnymi widobnymi twaŕskimi źěłami zachopiś.

Teke w zastojnstwje załožby su za lěto 2026 změny pśedwiźone. Teke w zastojnstwje załožby planujemy 2026 někotare změny. Tak smy na zakłaźe noweje koncepcije zachopili našu webstronu pśe- a wobźěłaś - jeje relanch ma kóńc lěta skóńcony byś.

W lěśe 2025 spisanu powšyknu koncepciju komunikacije za Serbow comy 2026 dalej wuwijaś a zgromadnje z partnarjami konkretne napšawy za jeje pśesajźenje wuźěłaś.
Mimo togo ma se pśeźěłana spěchowańska směrnica załožby w nalěśu 2026 wobzamknuś, kótaraž płaśi za pšosby wó spěchowanje wót 2027.

Teke personelnje buźo se w zastojnstwje wjele změniś, dokulaž wudaju se lětosa tśi na wuměńk. Naslědnistwo toś tych městnow jo teke južo internje rědowane.