Nazymske pósejźenje Załožboweje rady Załožby za serbski lud jo se wótměło tenraz w budyšyńskem Serbskem domje pód nawjedowanim pśedsedarja Załožboweje rady, Marka Kowarja.

Dypki dnjownego pórěda su byli mjazy drugim góspodaŕski plan załožby 2026, spěchowańska směrnica załožby, strukturne srědki pó § 17 co. 31 InvKG w Lichotnem staśe Sakska a staw planowanja "Serbski forum wědy pśi Lawskem arealu".

Góspodaŕski plan 2026

Rownož financěrowańske dogrono za załožbu kóńc lěta wuběžało a nowe hyšći pódpisane njebyło, jo Załožbowa rada góspodaŕski plan załožby za lěto 2026 schwaliła. Z tym jo dalšne financěrowanje institucijow a projektow znowa zawěsćone.

Góspodaŕski plan wopśimujo teke srědki za źěłowe městna, kótarež su doněnta až do kóńca 2025 wobgranicowane, tak až jo financěrowanje toś tych nejpjerwjej až do 30.06.2026 zarucone. Rozsud wó pókšacowanju twóri rada gaž Pěte financěrowańske dogrono pśedlažy.

Pśeźěłanje spěchowańskeje směrnice.

Tuchylu spěchowańsku směrnicu Załožby za serbski lud w zastojnstwje wobšyrnje pśeźěłaju. Mjazy drugim kśě nowe temy zaźěłaś.

Tak dejało se na pśikład spěchowanje nosaŕskich późělow resp. pśipłaśonki za zawodne kosty wšyknym serbskorěcnym a dwójorěcnym źiśecym dnjownym pśebywalnišćam zmóžniś. Zakład za spěchowanje su objektiwne kwalitatiwne kriterije nastupajucy wuměnjenja za imersiwne pśiswójenje serbskeje rěcy. Wó wótwórjonych pšašanjach nastupajucy zaměry spěchowanja, zwopšawdnjenja ako teke k financnemu planowanju buźo Załožbowa rada lětnjeju pósejźenju 2026 hyšći raz wobradowaś.

Załožbowa rada jo dalej pódpěrowała, až maju se do noweje spěchowańskeje směrnice skrotcone casowe doby za zapódaśe pšosbow za małe projekty pśiwześ.

Strukturne srědki wótpowědnje § 17 c. 31 InvKG w Lichotnem staśe Sakska

Slědujucy pórucenju pśirady k spěchowańskemu programoju "Serbska rěc a kultura w strukturnej změnje" za projekty w Lichotnem staśe Sakskej, jo wobzamknuła załožbowa rada, až se projekt Towaristwa za woplěwanje regionalneje kultury srjejźneje Łužyce z.t. "Drastwa digitalnje V: derbstwo" (Serbske drastwy ako digitalne kulturne derbstwo), pód wuměnjenim korektury etata 2026, w lětach 2026 až do 2030 spěchujo.

Zaměr projekta jo, až se serbska drastwowa kultura sakskeje Łužyce w digitalnej dobje zawěsćijo, dokumentěrujo a se šyroki publikum spśistupnijo. We wuskem zgromadnem źěle z nosaŕkami narodneje drastwy, šlodaŕkami, wědomnostnikami a kulturnymi institucijami, se typiske regionalne drastwy tšojodimentelnje rekonstruěruju, wěcejrěcnje dokumentěruju a pśez interaktiwnu, bźez barierowu webplatformu spśistupniju.

Zapódany projekt "LIPA - Lusatian Information, People & Arts" Bena Brězana se projektowemu nosarjeju wrośijo, aby jen hyšći dalej pśeźěłał.

Planowański staw "Serbski forum wědy pśi Lawskem arealu"

Załožbowa rada pśipóznawa pśeplanowanje "Serbskego foruma wědy pśi Lawskem arealu", kótarež jo było trjebne, aby se cełkowne kosty na 47,5 mio. EUR reducěrowali. Górna granica kostow wóstanjo dalej 50,0 mio EUR. Diferenca słužy ako pufer jo-lic kosty stupaju. "Na pósejźenju załožboweje rady jo se dobre a wědobnosćiwe źěło załožbowego zastojnstwa eksplicitnje wuzwignuło. Zagronite nadawki, kótarež se zmejstruju a rozsudy, kótarež muse se twóriś, su enormne nałožowanja casa a mócow mimo pópšawnego dnjownego źěła ", wugronijo se pśedsedaŕ załožboweje rady Marko Kowar chwalobnje.

Pó aktualnem stawje planowanja twaŕskeje napšawy jo se twaŕska pšosba za twaŕski wótrězk 1 (Hillerschowy ansambel) 1. nowember 2025 w Budyšyńskem měsćańskem zastojnstwje zapódała. Až do kóńca toś togo lěta ma se reducěrowanje kostow w twaŕskem wótrězku 2 (nowotwaŕ Lawskich groblow, postownja) do planowanjow zaźěłaś. Změnjony twaŕski plan se pótom pla Sakskego imobilijowego a twaŕskego managementa (SIL) zapódajo za wóspjetne twaŕsko-fachowe pśespytowanje.

Załožbowa rada jo legitiměrowała direktora załožby mimo togo, až smějo wugbaśowu fazu 5 wuwjeźeńskego planowanja za 1. twaŕski wótrězk (wóttergnjenje Lawskich groblow 8 a twaŕske jamy) zachopiś, pó wobkšuśenju dopołnosći twaŕskeje pšosby a twaŕskich pśedłogow. To jo trjebne, aby archeologija dosć casa měła, wuzwigujucu twaŕsku jamu pśepytowaś.