Pěte financěrowańske dogrono jo pódpisane a pó pšawje płaśece

Rada Załožby za serbski lud jo se źinsa zejšła pśi góźbje swójogo nalětnego pósejźenja w twarjenju SMWK w Drježdźanach. Do pósejźenja jo se Pěte dogrono k zgromadnemu financěrowanju oficielnje Załožbje za serbski lud, pśedsedarjeju Załožboweje rady, Markoju Kowarjeju, pśepódało. Toś to jo se wót zwězkowego ministarja nutśikownego, Aleksandra Dobrindta ako teke wobeju ministaŕskeju prezidentowu Lichotnego stata Sakskeje, Michaela Kretschmera a Kraja Bramborskeje, Dietmara Woidke we woběgowem jadnanju pódpisało.

Jadnanja su se zachopili južo w lěśu 2023 pód pśewjeźenim zwězkowego ministaŕstwa nutśikownego. Napóslědku financielne pódpěry su se mógali pśiměriś, tak až stej dalejwobstaśe załožby a jeje źěło za serbsku rěc a kulturu až do 2030 zawěsćonej. W tom zmysle wucynijo financielna pódpěra za 2026 cełkownje 29.256,0 TEUR, za lěta 2027 do 2030 pśedwiźi dogrono lětnje pówušenja spěchowańskeje sumy za wurownanje kostow. Ako doněnta financěrujo Zwězk tśi šesćinu, Lichotny stat Sakska dwě šesćinu a kraj Bramborska šesćinu.

Direktor załožby, Jan Budar, jo wujasnił: „Pśiměrjenje financielnych pódpěrow nam zmóžnijo, w zajźonych lětach etablěrowany rěd serbskich institucijow a projektow dostaś, bźez togo až musy se personal wóttwariś. Z tym móžo se teke pśichodnje zaměroju załožby na pśiměrjonu wašnju slědowaś.“

Pśedsedaŕ załožboweje rady, Marko Kowar, wudopołnijo: „Załožbowej raźe něnto pśistoj, w pśiducych lětach z wobstojecymi srědkami dobre a zagronite rozsudy twóriś, aby teke pó lěśe 2030 wobšyrne nadawki k zdźaržanju serbskeje rěcy, kultury a identity zwónoźeła.“

Załožbowa rada jo wobzamknuła dalejwjeźenje wót 2021 wutwórjonych wobgranicowanych městnow a k dispoziciji stajenje financěrowańskich srědkow až do 2030. Aby měli objektiwny zakład za rozsuźenje za dalejwjeźenje, su se wobgranicowane městna 2024 eksternje ewaluěrowali a jich trjebnosć jo se wobkšuśiła.

Za "Serbski forum wědy pśi Lawskem arealu" směju se něnto prědne wupisanja pśigótowaś. Gaž za 1. twaŕski wótrězk ("Hillesowy ansambel") twaŕske pśizwólenje pśedlažy a wupisańske pódłožki pokažu, až jo kostowy ramik doźaržany, smějo direktor wótpowědujucy pśizwólonemu wobzamknjenju prědne wugbaśa wupisaś a do nadawka daś. Tak mógu nejskerjej hyšći lětosa zachopiś, wězby a marodne drjewjane grědowe wjerchy wóttwarjowaś a wuměnjaś. Za 2. twaŕski wótrězk (postownja, nowotwaŕ) pśigótuju tuchylu twaŕsku pšosbu. Ned gaž źělne pśizwólenje pśedlažy, móžo se wótryśe twarjenja na Lawskich groblach 8 spśigótowaś. W tom pśeśěgu smějo se teke twaŕska jama wusajźiś, aby mógali z archeologiskimi pśepytowanjami zachopiś.

Załožbowej raźe jo se źinsa teke staw digitalizaciskich projektow prezentěrował. Za tym ako jo se techniska móžnosć zwopšawdnjenja spóznawanja rěcy a mašinelnego tekstowego pśełožka dojśpiła, stojtej něnto pólěpšenje kwality a za to trjebne zběranje rěcnych datow we fokusu. Na zakłaźe relewantnych pótrjebow (n. pś. chatowe boty, pśełožowaŕske słužby, kubłańske pórucenja) ma se až do nazymskego pósejźenja pśespytowaś, kótare kwantitatiwne, wopśimjeśowe a wužywańske pšawniske pótrjeby za dalšnu akwizu górno- a / abo dolnoserbskich rěcnych datow, kótarež su za trening toś tych wužywanjow trjebne.

Załožbowa rada jo wzeła koncept wuwiśa za Ludowe nakładnistwo Domowina tzwr na wědobnje, weto pomina sebje wudospołnjenje koncepta k wopśimjeśowemu wusměrjenju nakładnistwa a k priorizěrowanju pśedwiźonych napšawow w koncepśe.

Dalšne dypki dnjownego pórěda su se zaběrali z temami ako pomjenjenje nowych cłonkow pśirady za spěchowański program "Serbska rěc a kultura w strukturnej změnje" za projekty w Lichotnem staśe Sakska a rěcne wuwijanje w zastojnstwje załožby a spěchowanych institucijach.

protokol wobzamknjenjow