Załožba za serbski lud jo 20. februara wuběźowanje idejow „Rěč zwjazuje. Rěc zwězujo. Sorbisch verbindet. 2025“ wupisała. Z wuběźowanim pódpěra projekty, kótarež se zaběraju na originelnu wašnju ze serbskeju rěcu a kulturu – wósebnje take, kótarež zmócnjaju serbsku identitu w zjawnosći a w zgromadnem žywjenju ze njeserbskeju ludnosću.

Towaristwa, komuny, institucije, priwatne wósoby a druge nosarje su mógali swóje projektowe ideje až do 16. maja zapódaś. 

Kótare z cełkownje 50 zapódanych idejow by dejała Załožba z mytowańskimi pjenjezami gódnośiś, jo 12-cłonkojska jury na swójom pósejźenju 5. awgusta rozsuźiła. Za preměrowanje jo wóna dogromady 17 projektow wuzwóliła, kótarež su w procedurje pógódnośenja z dypkami nejwěcej dypkow dostali.

Do rozsuźenja jo sebje jury wšykne 50 zapódaśow woglědała a wó projektach wobradowała. Pó tom jo kuždy cłonk jury jadnotliwe projekty pó wěstych kriteriumach sam za sebje pógódnośił.

Cełkowne pógódnośenje jury, kótarež jo wóna 5. awgusta wobkšuśiła, jo zakład za załožbu, za někotare z wuzwólonych projektow połny wótcakowany pśipłaśonk za realizěrowanje pśizwóliś. Nastupajucy někotare dalšne projekty se załožba ze zapódawarjami dorozmějo, lěc a kak mógu planowanu napšawu z nišymi mytowańskimi pjenjezami, ako su wótcakowali, zwopšawdniś.

Załožba dowólijo zwězanje mytowańskich pjenjez z projektowym spěchowanim a zmóžnijo z tym realizěrowanje wšych projektow, kótarež jo jury we wuběźowanju na zakłaźe kwalitatiwnych faktorow ako nejlěpše pósuźiła. 

Statement jury:

“Smy byli pozitiwnje pśełapjone glědajucy na kopicu zapódanych projektow, wósebnje pak wó wjelerakosći idejow, a to ze wšych regionow Łužyce. Jo zwjaselece, až tak wjele luźi sebje mysli wó tom cyni, na kótaru wašnju by mógało se nałožowanje serbskeje rěcy w zjawnosći pódpěraś. W srjejźišću našogo rozsuda su stojali nowe a pśesegajuce ideje.” 

Slědujuce projekty su se za preměrowanje wubrali:

• Serbujuca zagrodka(Serbska zakładna a wuša šula Radwor)
• SorbPOI – digitalny POI-wjednik za dwójorěcny sedleński rum Serbow (Daniel Mirtschink, Słona Boršć)
• Nowostart!(„Altes Pfarrhaus Groß Döbbern“ z. t., Kopańce/Sprjewja)
• Beletristika za dorosćonych wuknjecych dolnoserbskeje rěcy (Šarlota Kušcyc, Chóśebuz)
• Interaktiwne bajowe figury w Pančičańskej zakładnej šuli – projekt wót wuknikow za wuknikow (Spěchowańske towaristwo Serbskeje zakładneje šule „Šula Ćišinskego“ Pančicy-Kukow)
• Serbski Manga: Wukšadnjony pókład (Siggiko – Emily Barthold, Chóśebuz)
• Serbske powěsći słyšaś a dožywiś – tšojorěcna awdioprodukcija regionalnych powěsćow (Zwězk za serbski kulturny turizm z. t., Budyšyn)
• Pśez adwent z Jurijom – Lutk pśinjaso rěc, wulicowańka a gusło do adwentskego casa (Saskia Bugai, Łuchow)
• Rozwjaselecy film wó serbskich stawiznach (Kira Hrjehorjec, Lipsk)
• Pópóškaś w góli – koncepcija za podcast-seriju wó gódnośe mjeńšynowych rěcow (Konstanze Kuška, Dešno-Strjažow)
• Droga spiwow … na slědach serbskich spiwow... (Walburga Wałdźic, Lipsk)
• Piš, pśijaśel, piš! – bilingualne knigły pśijaśelstwa za zakładnu šulu (Lisa Wimmer, Lubnjow)
• Spiw SJ Chrósćicy (Józef Donat za Holaski, Lipsk)
• Serbske "Tiny desk" -koncerty (Jan Rucha, Zdźěr)
• Piwowe wěko – našu rěc do gósćeńcow donjasć (Sylwija Reksowa, Janšojce)
• Serbski Skjarbošc – multimedialna wustajeńca k 800-lětnemu jubilejoju jsy Skjarbošc (Sophie Rädel za spěchowańske towaristwo za wjasku Skjarbošc)
• Wót realnego do digitalnego. Multimedialne zmakanišćo – móst mjazy zachadnosću a pśibytnosću. (Bogna Korjeńkowa, Pančicy-Kukow).

Załožba wózjawijo akle w zwisku z preměrowańskim zarědowanim dnja 14. nowembra 2025 w budyšyńskem Serbskem domje, kótarym projektam se pśizwóliju kótare mytowańske pjenjeze. 

Pśigranjańska partnaŕka za wuběźowanje jo:
Anka Němcec, +49 (0)3591 550 319, a.nemcec@zalozba.de