2. zwjazk

"Zběrka 11 wuměłskich spěwow nastawaše wot awgusta do decembra 1969 a je drje prěnja połnje płaćiwa twórba tehdy 15-lětneho Jura Mětška. Njejedna so tu hižo wo teenagera z ambicijemi, kiž chce so na polu hudźby pospytać... Mětšk pisaše tu hižo na niwowje, kotryž něhdyši kolegojo ani po lětdźesatkach tworjenja njedocpěchu." Tak hódnoći wudawaćel Ronald Hein zběrku, kotraž so nětko prěni króć zjawnosći spřistupnja.

Nimo basnjow Handrija Zejlerja, Jakuba Barta-Ćišinskeho a Róže Chěžkec (Domašcyneje) je młody komponist tež teksty kašubskeho basnika Alojzy Nagla, litawskeje basnicy Salomėje Nėris a litawskich basnikow Jonasa Mačiulisa-Maironisa a Aleksysa Churginasa zhudźbnił. Jich twórby bě jeho nan Frido Mětšk hižo w šěsćdźesatych lětach zašłeho lětstotka do serbšćiny přełožił.

Notowe wudaće zmóžnja nic jenož powołanskim interpretkam a interpretam předstajenje spěwow na koncertach a druhich kulturnych zarjadowanjach, z čimž by so Jura Mětškowe herbstwo hódnje zachowało a hajiło.

© Załožba za serbski lud
wudawaćel: Ronald Hein
sadźba: Hiroto Saigusa
płaćizna: 15,00 €

Zběrku Mětška předawamy w Serbskej kulturnej informaciji (SKI) w Budyšinje.