Koleginy Serbskeju kulturneju informacijowu ducy
Rozpšawa wó jich źěłabnosći zwenka kulturneje informacije

Serbska kulturna informacija LODKA jo w slědnych tyźenjach w Chóśebuzu a wokolinje ducy była.

18 studentow Geografiskego instituta uniwersity Mainz jo LODKA 27.02.26 do Serbskego doma wuwitała. Ekskursija jo jich do Łužycy wjadła a wóni su se intensiwnje ze serbskeju kulturu rozestajali. K tomu jo słušało teke pśednosk Mileny Stockoweje (LODKA) a Měta Nowaka, wědomnostny sobuźěłaśeŕ pśi Serbskem instituśe, Wótźělenje za regionalne wuwiśe a mjeńšynowy šćit.

We ramiku rěda pśednoskow Šule za dolnoserbsku rěc a kulturu jo Milena Stockowa stwórtk, 26.03.26 w Serbskem běrowje w Grodku k temje „Serbske institucije w Dolnej Łužycy, jeje nadawki a zaměry ” informěrowała. Wobźělniki su byli wjelgin zajmowane, su stajali wjele pšašanjow a su derje se rozgranjali. Pó pśednoskach w Lubinje (Błota) a Baršću (Łužyca) jo to było južo tśeśe zarědowanje lětosa.

Wałtoru, 31.03.26 jo LODKA z gósćom pla „Malteser“ w Chóśebuzu była. Sandra Mählojc jo pśednosowała k temje „Jatšy w Serbach“ a jo dała pśeglěd wó jatšownych nałogach. Rownocasnje su mógali wobźělniki na městnje sami jatšowne jajka bosěrowaś a pyšniś a to nawuknjone ned nałožowaś. Žywa wuměna wó małych wuměłskich twórbach, mustrach a jich wóznamach jo mjazy wobźělnikami nastała.

Njeźelu, 12.04.26 jo pśi Pisanem dwórnišću w Chóśebuzu wóspjetny raz serbski swěźeń „Małe jatšy ” wótměł, kótaryž jo Dolnoserbska kulturna akademija organizěrowała. Mimo wobšyrnego programa a muziki a rejow na jawišću su teke rucnikaŕske wiki byli. LODKA jo była z informaciskim stojnišćom zastupjona. Woglědowarje su měli dobru lawnu a su zajmowane byli, něco wó serbskej kulturje a jatšownych nałogach zgóniś.

Teke drogowańska wustajeńca LODKI „Jatšy w Serbach“ jo se lětosa wěcej raz pósćiła. Wóna jo była na Ludowej wusokej šuli Radebeul, w ewangelskej cerkwi Slěpe, w nakupowańskem centrumje Blechen Carré w Chóśebuzu ako teke w Towaristwowej brožni Hažow we wobłuku familijowego wótpołdnja k jatšam.

Serbske jatšowne tradicije žywje pósrědnja
Rozpšawa wó aktiwitach serbskeje kulturneje informacije w Budyšynje

W casu wót 22. februara až do 20. apryla jo teke serbska kulturna informacija (SKI) w Budyšynje wjelebocny program kołowokoło serbskich jatšownych tradicijow na nogi stajiła.

Centralny wobstatk aktiwitow jo był dogromady źaseś workshopow za pyšnjenje serbskich jatšownych jajkow. Toś te zarědowanja su se měrili na rozdźělne celowe kupki, su byli źělnje zjawne, ale teke indiwidualnje skazane, ako za rědownje a źiśownje a zwětšego pśewóźowachu je mimo koleginow z SKI teke eksterne fachnice. Tak su gósćam žywje pósrědnjali tradicionelne techniki a slězyny wó kulturnem wuznamje wuměłski wugótowanych jajkow. Zajm za workshop jo był wjeliki, wóni su byli wjelgin derje woglědane a zwětšego samo malsnje wuknigłowane.

Mimo togo jo se SKI aktiwnje na jatšownych wikach w Budyšynje ako teke w zastupnistwje Lichotnego stata Sakska pla Zwězka w Barlinju wobźěliła. Tam su prezentěrowali serbske nałogi šyrokej zjawnosći a pśinosowali k widnosći a gódnośenju serbskeje kultury zwenka regiona.

Cełkownje jo doba do jatš w kulturnyma informacijoma wjelgin źěłointensiwna – su se pśedawali na pśikład pśez 1.000 jatšownych jajkow, wjele wóska a sety za samostatne pyšnjenje jajkow a su se wudali njelicobne informacije wó Serbach we wšakich rěcach. Zrownju pak jo toś ten cas bogaty na zmakanja a dobrych rozgronach w kótarychž se cesto raźijo, wědu wó našom luźe šyriś, serbsku kulturu šyrokemu publikumoju zbližyś a kołowokoło serbskich jatš teke tradicionelne rucnikaŕstwo pósrědniś.