Tuchylna wólbna perioda Załožboweje rady zakóńcyjo se w měrcu pśiducego lěta. Rada za nastupnosći Serbow (RASW) napomina wó naraźenja za kandidatki / kandidatow do załožboweje rady za wólbnu periodu 2027-2031. Wótpowědujuce naraźenja za serbske zastupnice a zastupniki z Bramborskeje maju se až do 26.11.2026 pisnje pla RASW zapódaś.

Kandidatki a kandidaty by dejali slědujuce wuměnjenja społniś:

• pasiwne wólbne pšawo w Bramborskej
• znajobnosći serbskeje rěcy
• znaśa a nazgónjenja na pólu serbskeje kultury
• zwólniwosć, zagronitosći pśi rozsudach wó pśichodnych strukturach, wó prioritach projektowego spěchowanja a wó financnem wugótowanjow serbskich institucijow pśewześ
• zwólniwosć z drugimi serbskimi gremijami zgromadnje źěłaś

Pśepšosenje na informaciske rozgrono
Serbska rada pśepšosyjo wšykne kandidatki a kandidaty na informaciske rozgrono 07.12.2026 do Chóśebuza.

Dalšne informacije k zapódaśeju naraźenjow za kandidaty namakajośo we wózjawjonych pódłožkach RASW:

• Zawołanje Rady za nastupnosći Serbow
• Napšašnik za kandidatki/kandidatow 

Nadawki Załožboweje rady

Załožbowa rada rozsuźujo we wšyknych nastupnosćach załožby. Jeje rozsuźenja se pśigótuju wót załožboweje komisije a se wobzamknu na nalětnem respektiwnje nazymskem pósejźenju.

Załožbowa rada rozsuźujo wósebje wó:

• zwěsćenju góspódarskego plana, financnego planowanja a kóńclětnego wótlicenja,
• pówołanju a wótwołanju direktora kaž teke wó jogo wulichowanju,
• wustawkach załožby kaž teke wó wudaśu spěchowańskich směrnicow,
• spěchowanju wětšych projektow.

Załožbowej raźe pśisłuša cełkownje 15 cłonkow. Pó statnem dogronje wó załoženju załožby a wustawkach załožby pomjeniju a wótpósćelu se wót cełkownje šesć zastupnikow serbskego luda dwa wót Rady za nastupnosći Serbow kraja Bramborskeje a styri wót Zwězkowego pśedsedaŕstwa Domowiny. Kuždy cłonk ma měś zastupnicu / zastupnika.

Dalšne informacije wó Załožbowej raźe namakajośo na našom webboku pód "Załožba / struktura".