Dolnoserbska biblioteka ma lětosa 35. wrośenicu jeje wobstaśa.

Pśez procowanje iniciatiwneje kupki "Serbski dom", Domowiny a tegdejšego zagronitego města za serbske nastupnosći Bjarnat Rentš, jo dostała wót 20. junija 1991 w chóśebuskem Serbskem domje swój domicil. Lěc rownož w prědnem casu mimo drugich teke Měsćańska a regionalna biblioteka Chóśebuz pśedewześe pódpěrowała, njejsu byli take lěta jano mjodlizanje, mj. dr. dokulaž njejo móžno było, personal wěste pśistajiś.

W lěśe 2019 jo pśewzeła Załožba za serbski lud zagronitosć za biblioteku wót Domowiny. Wót lěta 2021 źěła how Bernd Pittkunings ako bibliotekaŕ a za zastojnske nastupnosći jo Simone Poetzschowa zagronita. W Dolnoserbskej bibliotece stoje cytarjam wšyknych generacijow wěcej ako 10.000 medijow k dispoziciji. Na nejwjetšy part su to knigły. Tśeśi źěl tych w nimskej rěcy, druge zwětšego w dolnej- a górnoserbskej rěcy, ale teke pó česku, pólsku, jenźelsku a dalšnych europskich rěcach. Póbitowanje biblioteki jo wusměrjone na zachadnosć a pśibytnosć Serbow a dalšnych narodnych, rěcnych abo nabóžnych mjeńšynow, ale se wě teke na Łužycu.

Něnto mamy 278 cytarjow. Nejwěcej zajma wubuźiju pla nich temy regionalne stawizny, serbske drastwy, nałogi, bajki, powěsći a lyrika, a wuslědki energijoweje politiki zachadnych sto lět na Łužycu a how bydlacych luźi. Dokulaž jo była Dolnoserbska biblioteka pśed pěś lětami wobydlarjam Chóśebuza zwětšego njeznata, procujo se biblioteka z nimsko-serbskimi zarědowanjami cytaŕskego raza teke wó nimske cytaŕstwo. To se tšoj cesto z partnarjami ako na pś. ze Šulu za Dolnoserbsku rěc a kulturu, towaristwom Eck 51 abo Lichym Nimskim zwězkom awtorow Bramborska. Wuspěch jo wiźeś, jo ga razka 30% našych cytarjow serbskorěcnych. Mimo togo jo se Dolnoserbska biblioteka wuwijała k městnoju, źož luźe pśidu, aby se serbski rozgranjali, w nejlěpšem paźe wó serbskorěcnej literaturje.