Dźěćace dźiwadłowe dny wuhotowaštej lětsa znowa Rěčny centrum WITAJ a Załožba za serbski lud. Přewjedźechu so hižo 25. raz, a to wot 21. do 22. meje w Budyskej młodowni a w Serbskim ludowym ansamblu.

Štyrceći dźěći ze Serbskeje zakładneje šule Ralbicy, Zakładneje šule "Mato Kosyk" Brjazyna a Žylowskeho Witaj-horta "Njewjerica" přijědźe do Budyšina.

W srjedźišću dnjow stejachu zaso dźěłarnički, kotrež wěnowachu so wažnym ćežišćam dźiwadźelenja, kaž improwizaciji a pohibowanju. Dźěłarnički nawjedowachu po dobrej tradiciji hrajerjo a režiserojo Němsko-Serbskeho ludoweho dźiwadła a tež dalši fachowcy: Petra-Maria Wencelowa-Bulankec, Beata Nastickec, Torsten Schlosser a Jurij Šiman.

Srjedu wječor pokaza Žylowski hort swoju aktualnu inscenaciju "Ptaškowa swajźba". Dalša dźiwadłowa skupina pod nawodom Milenki Rječcyneje předstaji krótku hru "Błudna šula". Tekst běchu šulerki a šulerjo sami pisali.

Štwórtk připołdnju prezentowachu młodźi hrajerjo wurězki z dźěłarničkow, štož so wšěm jara spodobaše. Z tutymi zajimawymi pokazkami, swědčacymi wo wobdarjenosći a fantaziji młodych akterow, so dźiwadłowe dny 2025 hódnje zakónčichu.